Полиция қызметкерлері төртінші сынып оқушысына алғыс айтты, деп хабарлайды @Pavlodarnews.kz тілшісі.

Облыстық полиция департаменті баспасөз қызметінің мәліметінше, Солнечный кентінің №16 ЖОББМ оқушысы Ксения Погребная мектептен үйіне келе жатқанда сауда үйінің жанында жерде жатқан iPhone маркалы ұялы телефонын байқаған. 

– Мен телефонды көтеріп, бірден полицияға бардым, – дейді Ксения. – Олардың көмегімен телефонның иесін тауып, қайтардым. 

Тәртіп сақшылары телефон ауыл тұрғынына тиесілі екенін анықтады. Оны кәмелетке толмаған ұлы үйіне келгеннен кейін ғана жоғалтып алғанын байқаған. 

Екібастұз қаласы ГРЭС-2 ПБ полиция бөлімшесінің бастығы Рустам Омаров Ксения Погребная мен оның анасын мектепке шақырды. 

–   Адалдықты сіңіріп, жақсы тәрбиелегені үшін анаңа ерекше алғыс айтамын. Бұл көптеген  балалар үшін жақсы үлгі болады, – деді Рустам Омаров.

Полиция қызметкері салтанатты жағдайда мектеп оқушысының әрекеті туралы айтып, белсенді азаматтық ұстанымы үшін алғыс білдірді.