Инвесторлар құрамына үш ұйым енді, деп хабарлайды @Pavlodarnews.kz тілшісі.

Коммерцияландыру рәсімі аяқталып, жаңа жеке инвесторлармен ынтымақтастық туралы меморандумға қол қойылды.  «Павлодар өзен порты» АҚ - 50%, «RR-CAPITAL» ЖШС - 25% және «Біріккен жеміс-көкөніс компаниясы» ЖШС - 25% инвестор атанды. 

Сонымен қатар, мемлекет балалар және әйелдер футболын дамытуға қолдау көрсетуді жалғастырып, осы бағыттарды қаржыландыруға қатысуын сақтайды.

Бұл - Қазақстан Республикасының Президенті Қасым-Жомарт Тоқаевтың отандық кәсіби футбол клубтарын коммерцияландыру жөніндегі тапсырмасын іске асырудағы маңызды қадам. Реформаның басты мақсаты: жеке инвестиция тарту, басқару тиімділігін арттыру және клубтардың қаржылық тұрақтылығын қамтамасыз ету.

«Ертіс» футбол клубы үшін бұл - бірнеше күрделі жылдан кейінгі дамудың жаңа кезеңі. 2020 жылы қаржылық қиындықтарға байланысты клуб жарыстарға қатысуын тоқтатса, 2022 жылдың қыркүйегінде банкрот деп танылды. Оны қайта жандандыру жұмыстары 2023 жылы басталды.

2024 жылы «Ертіс» Екінші лигада өнер көрсетіп, кәсіби футболға қайта оралды. Команда өз конференциясында сенімді түрде жеңіске жетіп, 22 ойынның 18-інде жеңіске жетті. Нәтижесінде 56 ұпай жинап, қарсыластар қақпасына 70 гол соқты. Келесі маусымда павлодарлықтар Бірінші лигада екінші орын алып, Премьер-лигаға жолдама жеңіп алды. Осылайша, небәрі екі жылдың ішінде клуб қайта жаңғыру кезеңінен өтіп, Қазақстан футболының жоғары дивизионына қайта оралды.

Қазақстан Премьер-лигасына қайта оралу клубтың 60 жылдық мерейтойымен тұспа-тұс келді. Өз тарихында «Ертіс» бес рет Қазақстан чемпионы атанды: 1993, 1997, 1999, 2002 және 2003 жылдары. Сондай-ақ ел Кубогын жеңіп алды. 

Өңір басшысы Асайын Байханов клубтың коммерциялық басқару моделіне көшуі оның алдағы уақытта тұрақты дамуына негіз болуы тиіс екенін атап өтті.

Кәсіби футбол тиімді басқаруды, серіктестермен жүйелі жұмысты, меншікті табыс көздерін және ұзақ мерзімді инвестицияларды талап етеді. Коммерцияландыру жаңа мүмкіндіктерге жол ашады. Сонымен қатар өңіріміз, жанкүйерлер және футболшылардың келесі буыны алдындағы нәтижеге деген жауапкершілікті арттырады, – деп атап өтті Асайын Байханов.

Клубты инвесторларға беру алдында оның мүлкіне бағалау жүргізіліп, қажетті рәсімдер толық аяқталды. «Павлодар өзен порты» АҚ 2026 жылы клубты қолдау мақсатында демеушілік көмек ретінде 250 млн теңге бағыттады. Жыл соңына дейін тағы 250 млн теңге инвестициялауды жоспарлап отыр. Алдағы уақытта үш инвестор да «Ертісті» қаржыландыру, инфрақұрылымды, негізгі және жастар командаларын дамыту бойынша ұзақ мерзімді міндеттемелер алады. Жыл сайынғы инвестиция көлемі кемінде 1,5 млрд теңгені құрайды.

Жаңа стратегияның басым бағыттарының бірі балалар мен жасөспірімдер футболын дамыту болмақ. Іріктеу бағытында жұмыстар күшейтіліп, талантты жас футболшылардың балалар командасынан негізгі құрамға өтуіне қажетті жағдайлар жасалады. Әйелдер футболын дамытуға да ерекше көңіл бөлінеді. Бұл бағыттарға мемлекет тарапынан қолдау көрсету жалғаса береді.

«Ертістің» коммерциялық басқару моделіне көшуі клубты ұзақ мерзімді дамыту жүйесін қалыптастыруға мүмкіндік береді. Әлемдік тәжірибеде кәсіби командалардың тұрақтылығы демеушілік қолдау, коммерциялық кірістер, маркетинг, медиа құқықтар және жеке инфрақұрылымды дамыту есебінен қамтамасыз етіледі.

Павлодар клубы үшін дамудың жаңа кезеңі Премьер-лигадағы орнын нығайтуға, өз тәрбиеленушілерін даярлауға инвестиция салуға және ҚПЛ-дегі позициясын күшейтуге мүмкіндік береді.

Бұдан бөлек, 2028 жылы өңірде 25 мың көрерменге арналған заманауи футбол стадионының құрылысы жоспарланған. Ал келесі жылдан бастап мемлекеттік-жекешелік әріптестік аясында 200 жас спортшы білім ала алатын футбол академиясын ашу көзделіп отыр.