Биылғы маусымда команда үш жеңіске жетті, деп хабарлайды @Pavlodarnews.kz тілшісі.

2024 жылдың соңғы матчтарында Бранислав Грегорич шәкірттері алматылық «Irbis-Alatau» командасымен кездесті. Матчтар демалыс күндері №2 СДЮШОР алаңында (бұрынғы СК Автовис) өтті. Бірінші кездесуде павлодарлықтар 76:94 есебімен жеңіліп қалды.

«Ertis» екінші матчқа жақсы көңіл-күймен шықты. Команда тамаша көрінді, шабуылдарды 24 ұпай жинаған Назим Адылбеков нәтижелі аяқтап жүрді. Жанкүйерлер павлодарлықтар өз алаңындағы алғашқы жеңісіне қол жеткізеді дей бастады.

Алайда үшінші тоқсанның соңына қарай «Ertis» ойынында проблемалар туындай бастады: ойыншылар алматылықтарға ілесе алмады. Мысалы, қазір «Irbis-Alatau» сапында өнер көрсететін бұрынғы павлодарлық ойыншы – Кешон Табб және оның серіктестері жиі-жиі қарымта шабуылдарда нәтижеге қол жеткізе бастады.

Соңғы он минутта павлодарлықтардың есептегі басымдығы көктемдегі қардай ери бастады. Шындап келгенде «Ertis» физикалық тұрғыдан шаршады. Америкалықтар Кешон Табб пен Перри Джалон ақыры алаң иелерінің қорғанысын әбден бұзды. Қорытындысында барлығы 79:69 есебімен «Irbis-Alatau» командасының жеңісімен аяқталды.

«Ertis» турнирлік кестеде соңғы орында. Команда келесі кездесуін 2025 жылдың 5 қаңтарында Қостанайда жергілікті «Тобылға» қарсы өткізеді. Павлодарда сүйікті баскетболшыларымызды тек 4 ақпанда көреміз, «Ertis» «Ақтөбеге» қарсы ойнайды.