Полиция әркімнің еңбегіне құрметпен қарауды сұрайды, деп хабарлайды @Pavlodarnews.kz тілшісі.  

Такси жүргізушісі полицияға қоңырау шалып, жолаушыны таңертең межелі жерге жеткізгенін, алайда қызмет ақысы төленбегенін хабарлаған. Ол тапсырысты қабылдап, әйел адамды межелі жерге жеткізген. Жолаушы келген соң өзімен бірге қолма-қол ақшасы жоқ екенін, үйге барып алып шығатынын айтқан да көліктен түсіп кеткен. 

–  Мен оны 30 минут күттім, содан кейін полицияға қоңырау шалдым. Мәселе ақшада емес, моральдік қолайсыздық тудыруында. Мен өз жұмысымды адал орындадым, ал ол мені алдап кетті, – деп қапаланады жүргізуші. 

Басқа такси жүргізушісі де полицияға осындай шағыммен жүгінген.  Бұл жолы да таксиге отырған ересек ер адам жол бойы жақсы сөйлесіп келген. Клиент төлемді қолма-қол ақшамен көрсеткен. Дегенмен соңғы нүктеде үнсіз шығып, есікті тарс жауып кеткен. Жүргізуші жолаушы ақшаны алып келеді деген үмітпен 20 минут күткен, бірақ сапарға ақы төленбеген. Салдарынан жаңа тапсырыс беруге болатын уақытын жоғалтқан.