Облыстық этномәдени бірлестіктер жүзден астам шара өткізді, деп хабарлайды @Pavlodarnews.kz тілшісі.

Бұл туралы Қазақстан халқы Ассамблеясының 30 жылдығына арналған алғашқы республикалық Достық үйлері конгресінде өңірдегі Достық үйінің басшысы Нүрия Күбенова айтып берді. Шығыс Қазақстан облысында өткен ауқымды шараға ел облыстарынан Достық үйлерінің директорлары, этномәдени бірлестіктердің өкілдері, мемлекеттік органдар, сарапшылар мен жастар жиналды.

Конгресс өңіраралық тәжірибе алмасу, қоғамдық келісімді дамыту, азаматтық бірегейлікті нығайту және Қазақстанның мәдени әртүрлілігін ілгерілету бойынша жаңа тәсілдерді талқылауға арналған алаңға айналды. Қатысушыларды Қазақстан халқы Ассамблеясы төрағасының орынбасары Марат Әзілханов құттықтады.

Нүрия Күбенова павлодарлықтардың тәжірибесімен бөлісті.

– Біздің өңір Ассамблея бастамаларын әрдайым қолдайды. Этномәдени бірлестіктер мен қоғамдық құрылымдарды біріктіретін жаңа тәжірибелерді өз қызметіне енгізіп келеді, – деді Достық үйінің басшысы.

Облыста 20-дан астам жоба іске қосылып, оған жеті мыңнан астам тұрғын қатысқан. Бірлескен жобаларға басымдық беріледі, бұл бағытта Достық үйі этностар арасындағы ашық әрі сындарлы диалогқа арналған алаң ретінде қызмет атқарады.

2024 жылы Павлодар облысының әкімі Асайын Байхановтың бастамасымен іске қосылған «Қазақша ән саламыз» жобасы ерекше назарға лайық. Бұл жоба арқылы мемлекеттік тілді үйрену әдеби-музыкалық композициялар, караоке, түрлі этнос өкілдерінен құралған ансамбльдер мен дуэттердің мемлекеттік тілде ән орындауы арқылы жүзеге асырылады.

Жазғы кезеңде жоғары сынып оқушылары, колледж студенттері мен этномәдени бірлестіктердің жастарын жұмыспен қамтуға бағытталған жоба мен «Ұлттық мұра орталығы» жаңа бастамасы қызығушылық тудырады. Мақсат – ұмыт бола бастаған дәстүрлер мен қолөнер түрлеріне жаңа өмір сыйлау.

Айта кету керек, алғашқы этномәдени жоба ретінде ҚХА трамвайы – жылжымалы алаң қолданылды. «Tram WAY» жобасының әр шығарылымы тіл, дәстүр, патриотизм, отбасы тарихы, этносаралық өзара әрекеттестік сияқты тақырыптарға арналады.

Нүрия Күбенованың айтуынша, республикалық конгресс өңіраралық платформа ретінде этносаралық келісімді нығайту тетіктерін, жаңа сын-қатерлер мен Достық үйлерінің болашақ жұмыс бағыттарын талқылауға мүмкіндік берді.