Олар отбасылық демалыс, спорт, туризм және сауықтыру үшін тартымды орталық құруды мақсат етуде, деп хабарлайды @Pavlodarnews.kz тілшісі.

Павлодарлық кәсіпкер Болат Смағұлов Павлодар облысының басшылығына «Черноярская жемчужина» кешенін жаңғырту мысалында туризм мен демалысты дамыту жөнінде өз көзқарасын білдірді.

Компания құрылтайшысының айтуынша, өткен жылы кешенге 325 миллион теңге инвестиция салынған. Аумақта 150 орындық шипажай орналасқан, онда төрт жарым мың адам демалған.

– Жанында орналасқан «Золотая Нива» балалар лагерін сатып алғаннан кейін инфрақұрылымды белсенді дамыту басталды. Өткен жылы үлкен және кіші екі бассейн салынды, беседкалар мен 50 шезлонг орнатылды. Белсенді демалыс үшін спорт және балалар алаңдары пайда болды. Күзет пунктіне қосылған 45 бейнебақылау камерасы орнатылды, – деді кәсіпкер.

«Золотая Нива» аумағында қазірдің өзінде 25 нөмірлі, 100 орындық корпус бар. Нысанды қайта жаңғыртуға тағы 300 миллион теңге инвестициялау жоспарланып отыр.

Кәсіпкердің айтуынша, жобаның басты мақсаты – болашақта ірі туристік ұйым қалыптастырып, туристер ағынын 100 мың адамға дейін жеткізу. Сондықтан алдағы жылдары инвесторлар тағы 500 миллион теңге салуды жоспарлап отыр.

– Даму жоспарына аумақты кеңейту және жаңғырту, жыл бойғы демалыс инфрақұрылымын құру, спорттық және ойын-сауық аймақтарын дамыту, сервисті жақсарту және жайлылық деңгейін арттыру кіреді, – деді Болат Смағұлов.

Жоба аясында жаңа нысандар салу көзделген. Яғни көлеңкелі күркелер, жазғы кинотеатр, спорт алаңдары, 200 орындық мейрамхана, SPA-аймақ, ескі үйлердің орнына заманауи барнхаус үлгісіндегі үй, мұз айдыны, гастрономиялық бақ және қысқы жаңа жылдық резиденция.

Жаңа барнхаустар желімделген бөренеден салынады. Алдымен іргетас пен негіз дайындалып, кейін құрылымдар жеткізіліп, орнында құрастырылады. Сонымен қатар, демалушылар үшін қосымша сауда нүктелері мен сервистер ашу жоспарлануда.

Жобаны қаржыландыру несие қаражаты есебінен жүзеге асырылуда. Қазіргі уақытта басшылық Қазақстан Халық банкінен несие мақұлдауын күтуде.