Шарбақты аудандық балалар мен жасөспірімдер спорт мектебінде өткен жылдың қараша айында алғаш рет бокс секциясы ашылды, деп хабарлайды @Pavlodarnews.kz тілшісі.

Қазіргі таңда мұнда екі жас ерекшелігі бойынша 36 бала жаттығады. Ең қызығы, спортқа қыз балалар да қызығушылық танытуда. Мәселен, он жастағы Виталина ұлдармен бірге жаттығып, өзінің жақсы физикалық дайындығы, табандылығы мен төзімділігінің арқасында жақсы нәтижелер көрсетіп жүр.

Жас спортшылармен тәжірибелі жаттықтырушы Ержан Ішімов жұмыс істейді. Ол – бокстан спорт шебері, КСРО-ның бірнеше дүркін чемпионы, 25 жылға жуық жаттықтырушылық тәжірибесі бар маман. Осы уақыт ішінде ол түрлі деңгейдегі жарыстардың көптеген жүлдегерлері мен жеңімпаздарын тәрбиелеп шығарған.

Секцияның ашылуы аудан әкімі мен спорт мектебінің директоры қолдауының арқасында мүмкін болды. Бүгінде жаттығу залы толық қажетті құрал-жабдықтармен қамтылған, бұл сапалы дайындық өткізуге мүмкіндік береді.

Бокс спортын жарақат қаупі жоғары деп есептейтін пікірлерге қарамастан, жаттықтырушылар алғашқы сабақтардан бастап қорғанысқа ерекше көңіл бөледі. Бұл жарақат алу қаупін айтарлықтай төмендетеді.

Үш ай ішінде секция тәрбиеленушілері алғашқы жетістіктеріне де қол жеткізді. Жаңадан бастағандар арасындағы ауданаралық жарыста олар үшінші орынды иеленді. Ал Тереңкөлде өткен ашық турнирде шарбақтылық боксшылар бір бірінші, төрт екінші және бес үшінші орынды жеңіп алды.