ERG денсаулық фестиваліне энергетика кәсіпорындары қызметкерлерінің екі жүзге жуық баласы қатысты, деп хабарлайды @Pavlodarnews.kz тілшісі.

Ақсу қаласында «Еуразиялық энергетикалық корпорациясы» АҚ мен «ERG Service» ЖШС Павлодар жөндеу басқармасы филиалының қызметкерлерін біріктірген ERG Summer Go Fest жазғы денсаулық фестивалі өтті. Ауқымды отбасылық шара бірден екі мерекеге – жазғы демалыстың басталуы мен Халықаралық балаларды қорғау күніне орай ұйымдастырылды.

Таңертеңнен бастап И.Күтпанұлы атындағы спорттық-сауықтыру кешенінің аумағында мерекелік көңіл-күй орнады. Балаларды Стич пен Лабубу кейіпкерлерінің жарқын костюмдерін киген аниматорлар қарсы алды. Ойын және шығармашылық алаңдар жұмыс істеп, әуен шырқалып, жүргізушілер қатысушыларға көтеріңкі көңіл-күй сыйлады.

Мерекенің ашылу салтанатында ұйымдастырушылар фестивальдің энергетиктер арасында игі дәстүрге айналғанын атап өтті.

– Бүгін біз спорттың, қозғалыстың және көтеріңкі көңіл-күйдің тамаша мерекесін бірге атап өту үшін жиналдық. Бұл күн әріптестермен және отбасымен уақыт өткізуге, командалық рухты сезінуге әрі денсаулық, белсенділік пен позитивтің бізді күштірек ететініне тағы бір мәрте көз жеткізуге арналған, – деді жүргізушілер сахнадан.

Отбасылық құндылықтар – басты басымдық

Қатысушыларды «ЕЭК» АҚ персонал және корпоративтік мәдениет жөніндегі директоры Айдос Адай құттықтады.

– Осындай сәттерде біз ең маңызды құндылықтарды – қолдау көрсетуді, бір-бірімізге деген қамқорлықты және отбасының маңызын еске аламыз. Бүгін жақындарымен бірге келіп, осы шуақты күнді бізбен бөліскен баршаңызға алғысымды білдіремін, – деді ол.

Ұйымдастырушылардың айтуынша, фестивальге кәсіпорын қызметкерлерінің екі жүзге жуық баласы қатысқан.

Әр жасқа арналған жеке кеңістік

Фестиваль бағдарламасы барынша мазмұнды әрі қызықты болу үшін аумақ бірнеше тақырыптық аймаққа бөлінді. Әр алаң қатысушылардың жас ерекшеліктеріне қарай ұйымдастырылды.

Орталық алаңда шығармашылық ұжымдардың концерттік бағдарламалары, викториналар мен байқаулар өтті. Балалар аниматорлармен бірге ойнап, асфальтқа бормен сурет салды, жүннен жасалатын шоуға қатысып, алып сабын көпіршіктерін тамашалады.

10-13 жас аралығындағы жасөспірімдер үшін жеке ойын-сауық алаңы ұйымдастырылды. Мұнда командалық челлендждер, би баттлдары, музыкалық сайыстар мен жылдамдыққа арналған ойындар өтті.

Ең белсенді қатысушылар футбол алаңында бас қосты. Мұнда 8-10 жас аралығындағы балаларға арналған эстафеталар ұйымдастырылып, олар ептілік, жылдамдық және командада жұмыс істеу қабілеттерін көрсетті.

Спорттық аймақ ұйымдастырушыларының бірі фестиваль бағдарламасына ерекше сайыстар енгізілгенін айтты.

– Біз таяқша тапсыру арқылы өтетін «Достық» эстафетасын, үлкен теннис ракеткаларымен доп тасуды, қаппен секіруді, жаз тақырыбындағы сурет байқауын және алып «шортандарды» қармақпен ұстау ойынын дайындадық. Сонымен қатар үйлесімділік пен командалық өзара әрекетке арналған тапсырмалар қарастырылды. Егер командалар бірдей ұпай жинаса, жеңімпаз капитандар арасындағы дартс сайысында анықталады, – деді ұйымдастырушылар.

Жас суретшілер үшін де арнайы алаң жұмыс істеді. Мұнда балалар шеберлік сабақтарына қатысып, қолөнер бұйымдарын жасап, үлкен ортақ баннерді бояды.

Аквагрим, флешмоб және тәтті сыйлықтар

Мереке барысында аквагрим аймақтары жұмыс істеп, балалар өздерінің сүйікті кейіпкерлеріне немесе ертегі қаһармандарына айналды. Қызықты викториналар мен балалар мен ересектерді біріктірген сергіту флешмобы көпшіліктің ерекше ықыласына ие болды.

Ұйымдастырушылардың айтуынша, бағдарлама кішкентай балаларға да, жасөспірімдерге де лайықталып жасалған. Жас ерекшеліктеріне қарай бөлінген алаңдардың арқасында әр бала өз қызығушылығына сай көңіл көтеру мүмкіндігіне ие болды.

«Балаларға ұнайды – ең бастысы осы»

Көптеген қызметкерлер фестивальге отбасыларымен бірге келді.

«ERG Service» Павлодар жөндеу басқармасының жөндеу слесары Евгений Киселёв мерекеге жұбайы және қызымен қатысты.

– Бүгін барлық шаруаны кейінге қалдырып, осында келуді жөн көрдік. Барлығы көңілді, жақсы ұйымдастырылған. Балаларға өте ұнайды. Атмосфера тамаша, – деді ол.

Корпоративтік іс-шаралардың тұрақты қатысушысы, «ЕЭК» АҚ қызметкері Анастасия Путинцева да мерекеге ұлымен бірге келген.

– Осындай шараларға жыл сайын қатысуға тырысамыз. Барлық қызметкерлердің бір жерде бас қосуына мүмкіндік жасаған ұйымдастырушыларға рақмет. Балалар бір-бірімен танысып, араласып, уақыттарын белсенді өткізеді. Әсіресе ойын-сауық бағдарламаларының жас ерекшеліктеріне қарай бөлінгені ұнайды, әркім өзіне қызықты іс таба алады, – деді ол.

Жаз жарқын әсермен басталды

Фестиваль соңында қатысушыларға тәтті сыйлықтар мен естелік тартулар табысталды. Бірнеше сағат ішінде мерекелік алаң үлкен отбасылық демалыс кеңістігіне айналып, балалар жарқын эмоцияларға бөленсе, ересектер жақындарымен бірге уақыт өткізуге мүмкіндік алды.

Денсаулық фестивалі тағы бір мәрте ERG кәсіпорындарындағы корпоративтік іс-шаралардың әлеуметтік саясаттың маңызды бөлігі ғана емес, қызметкерлер мен олардың отбасыларын біріктіретін жақсы дәстүрге айналғанын дәлелдеді.

Фото: ERG баспасөз қызметі

Серіктестік материал