Қызметтер енді eGov пен «Е-лицензиялау» арқылы онлайн көрсетіледі, деп хабарлайды @Pavlodarnews.kz тілшісі.

«Атамекен» ұлттық кәсіпкерлер палатасы баспасөз қызметінің мәліметінше, 2025 жылғы 25 тамыздан бастап азаматтық қорғау және құрылыс саласындағы заңнамаға енгізілген жаңа өзгерістер күшіне енді. Енді көп адам жиналатын нысандар мен биіктігі 28 метрден асатын ғимараттарды өрт қауіпсіздігі қорытындысынсыз пайдалануға беру мүмкін емес.

Құжатқа сәйкес, қорытындыны алу нысанды ресми қабылдау процесінің міндетті бөлігіне айналды. Бұрын әкімдіктер арқылы берілген арнайы техникалық шарттарды енді төтенше жағдайлар министрлігі келіседі. Сонымен қатар, 2026 жылғы 1 ақпаннан бастап қызметтер тек eGov порталы және «Е-лицензиялау» арқылы онлайн көрсетілетін болады.

«Атамекен» ұлттық кәсіпкерлер палатасы бұл өзгерістер кәсіпкерлерге қосымша тәуекелдер тудыруы мүмкін екенін ескертеді. Нысандарды пайдалануға беру мерзімі ұзаруы, техникалық қадағалау қайталануы және сыбайлас жемқорлық тәуекелдерінің артуы ықтимал.