Тиісті рұқсатсыз еңбек қызметін жүзеге асырған 122 шетелдік азамат ұсталды, деп хабарлайды @Pavlodarnews.kz тілшісі.

Облыс аумағында көші-қон заңнамасының құқық бұзушылықтарының алдын алуға бағытталған «Мигрант» бес күндік жедел-профилактикалық іс-шарасы аяқталды. 

Павлодар облысы ПД хабарлауынша, аталған іс-шараның қорытындысы бойынша полицейлер 352 азаматты жауапқа тартты, оның ішінде 237 шетелдік, 115 ҚР азаматы.  Тиісті рұқсатсыз еңбек қызметін жүзеге асырған 122 шетелдік азамат, сондай-ақ оларға жұмыс берген 39 кәсіпкер анықталған.  

– Шетелдік азаматтардың еңбек қызметін жүзеге асыру үшін қажетті шарт – уәкілетті органның рұқсатын алу. Бұл ретте, өңір тұрғыны екі шетелдік азаматты қолөнерші ретінде қызметке алған. Жұмыс беруші мен шетелдіктер де жауапқа тартылды, – деді департаментте. 

Бұдан басқа, елден 14 шетел азаматы шығарылған, сотқа азаматтық сот ісін жүргізу тәртібімен шығарып жіберуге бес материал жіберілген. Бұл ретте, іздеуде жүрген бір қылмыскер анықталған.