Өңірде биылғы жеті айда ауыл шаруашылығы өнімдерінің көлемі 145 миллиард теңгеден асты, деп хабарлайды @Pavlodarnews.kz тілшісі.

Жыл басынан бері облыстағы ауыл шаруашылығы кәсіпорындарының негізгі капиталына салынған инвестиция көлемі 105,1 миллиард теңгеге жетті. Бұдан бөлек, азық-түлік өнімдерін өндіруге 4,6 миллиард теңге инвестиция бағытталды.

Өткен жылы өңірдің агроөнеркәсіптік кешенінде 225 миллиард теңге инвестиция игерілді. Биыл да осы көлемде инвестиция тарту жоспарланып отыр.

Саланы қаржыландыруға мемлекет пен қаржы институттарымен қатар, шаруа қожалықтары мен ауыл шаруашылығы кәсіпорындарының өз қаражаты да жұмсалады. Инвестиция тартуға жеңілдетілген несиелер, лизинг, инвестициялық субсидиялар және қарыздар бойынша сыйақы мөлшерлемесін субсидиялау сияқты қолдау шаралары ықпал етуде.

Өңірде ауыл шаруашылығы өнімдерін өндіру көлемі де артып келеді. Жыл басынан бері мал шаруашылығында тірі салмақта 57,8 мың тонна ет және 148,4 мың тонна сүт өндірілді. Сонымен қатар, сүт өндіру бағыты бойынша өндіріс қарқынын одан әрі арттыру қажет.

Инвестициялық жобаларды жүзеге асыруға да үлкен мән беріліп отыр. Өткен жылы өңірде жалпы құны 351 миллиард теңге болатын 25 жоба іске қосылды. Жаңа өндірістер ауыл шаруашылығы өнімдерін қайта өңдеуді дамытуға, қолданыстағы кәсіпорындарды жаңғыртуға және өңірдің экспорттық әлеуетін арттыруға бағытталған.

Инвестициялар шаруашылықтарға ауыл шаруашылығы техникаларын жаңартуға, заманауи технологияларды енгізуге және өндіріс көлемін ұлғайтуға мүмкіндік береді. Саланы қолдау құралдарының бірі – көктемгі дала жұмыстарын алдын ала қаржыландыру. Бұл аграршыларға егіс науқанына ертерек дайындалуға мүмкіндік берді.

Ауыл шаруашылығы шикізатын қайта өңдеуге де ерекше көңіл бөлінуде. Бұл бағытты дамыту қосылған құны жоғары өнімдердің үлесін арттырып, жергілікті жерде өндірілетін тауарлардың ассортиментін кеңейтуге мүмкіндік береді.

Инвестициялық жобалардың әлеуметтік маңызы да зор. Жаңа өндірістерді іске қосу және жұмыс істеп тұрған кәсіпорындарды кеңейту ауылдық жерлерде жаңа жұмыс орындарын ашуға мүмкіндік береді.

2030 жылға дейін аймақта ауыл шаруашылығында өсімдік және мал шаруашылығын жаңғыртуға, өнімді қайта өңдеуді дамытуға және Павлодар облысының экспорттық әлеуетін арттыруға бағытталған ірі жобаларды іске асыру жалғаспақ.