Мұндай мүмкіндікке «Қазпошта» АҚ және «Азаматтарға арналған үкімет» КЕАҚ бірлесе отырып жүзеге асырған жоба аясында қол жеткізілді, деп хабарлайды @Pavlodarnews.kz тілшісі.  

«Қазпошта» АҚ баспасөз қызметінің мәліметінше, пилоттық жоба еліміздің үш өңірден іске қосылған. Бұл – Алматы, Павлодар және Ақмола облыстарын. Енді аталған өңірлердің тұрғындары ауылдық пошта бөлімдерінде шамамен 27 мемлекеттік қызметті ала алады. Оның ішінде жәрдемақының кейбір түрлерін, мүгедектігі бар адамдар үшін арнайы қызметтерге құжаттарды рәсімдей алады, мекенжай бойынша тіркеліп, мұрағаттық анықтамаларды немесе мұрағаттық құжаттардың көшірмелерін ала алады.

Ауылда мемлекеттік қызметтерді ұсыну тұрғындарға аудан мен қалаға жолға кететін уақыт пен ақшаны үнемдеуге мүмкіндік беріп, ауылдық бөлімшелер жұмысын ынталандыруға әрі олардың экономикалық тиімділігін арттыруға жол ашады.

– Мемлекеттік қызметтерге және мемлекеттік органдарға қол жеткізу нүктелерін ашу бойынша жұмыс – бұл ауыл тұрғындары үшін мемлекеттік қызметтердің қолжетімділігіне кепілдік беріп қана қоймай, цифрлық сервистер мен өзге де мүмкіндіктерді танымал етуге мүмкіндік беретін базалық жоба. Биыл 100-ге жуық осындай нүкте ашылады, алдағы уақытта 2 мыңға жуық осындай нүктелерді қамту жоспарлануда, – деп атап өтті цифрлық даму министрі Бағдат Мусин.

Қазіргі таңда Қазпошта ұйымдастырушылық-дайындық жұмыстарын жүргізуде әрі әдістемелік және интеграциялық процестерді дайындауда. Дайындық кезеңінде ХҚО жүйесі тестілеуден өтіп, мемлекеттік қызмет көрсетудің реті мен алгоритмі зерттелді. ХҚО ақпараттық-коммуникациялық жүйесінде жұмыс істеу үшін ауылдық бөлімшелердің 50 операторы оқытылды.

– Бүгінде ауыл тұрғындары жолға уақыт кетіріп, сол үшін бүкіл жұмыстарын тастап, уақытты босқа өткізгілері келмейді. Ол үшін мемлекеттік корпорация осындай мүмкіндік беріп отыр. Біз мемлекеттік қызметтерді кез келген адам ала алу керек деп ойлаймыз. Осы ретте қызметті алушының жеке мәліметтері құпия сақталатынын айтқымыз келеді. Қазпошта қызметкерлері ақпараттық қауіпсіздік мәселесінде Мемлекеттік корпорация саясатын ұстанатын болады, - деді мемлекеттік корпорация басқармасы төрағасы Сүйеніш Әбділдин.

«Қазпошта» АҚ басқарма төрағасы Әсел Жанасованың айтуынша, көптеген ауыл тұрғыны үшін пошта – күнделікті тұрмысқа қажет қызметтерді алудың жалғыз көзі. Қазір 50 ауылдық пошта бөлімшесінде мемлекеттік қызметтерді көрсетуге дайын, ал болашақта мұндай бөлімшелердің саны тағы да көбейтілмек. Алдағы уақытта олардың санын шамамен 2000 бөлімшеге дейін жеткізу жоспарланып отыр және олардың барлығында түрлі мемлекеттік қызметтер көрсетілетін болады.