«Ертіс» футбол клубының ойыншылары Бірінші лигадағы алғашқы кездесуіне дайындалуда, деп хабарлайды @Pavlodarnews.kz тілшісі.

Екінші лиганың Солтүстік-Шығыс конференциясында өткен жылғы маусымның ең нәтижелі ойыншысы Арман Смайылов Қазақстан Кубогының алдын ала кезеңінде де мергендігімен көзге түсе білді. Бұл күндері команда Павлодарда жаттығу жұмыстарын жүргізуде.

- Біздің бір мақсат – ҚПЛ-ға шығу, өз алдыма командаға барынша пайда әкелуді, көбірек гол соғуды мақсат етіп қойдым. Қарсыластардың біразымен кездескенбіз. Оңай ойындар болмайды, бірақ біздің командада тапсырманы орындау үшін қажеттінің бәрі бар, - дейді шабуылшы.

Арман Смайыловтың айтуынша, қазақстандық футбол маусымының жаңа ресми добы Adidas Conext 25 бұрынғыларынан айтарлықтай айырмашылығы жоқ. Десек те, шабуылшы доптың бір ерекшелігін атап өтуді жөн көрді: соққылар мығым болып шығады.

Adidas Conext 25 2024 жылдың желтоқсан айында Adidas Fussballliebe және Adidas Conext 24 Pro сияқты технологияға негізделген 2024 жылы Катарда өткен ФИФА Құрлықаралық кубогының ресми матч добы ретінде шыққан еді.

27 жастағы Арман Смайылов «Ертістің» түлегі. Ол өз мансабында туған командасынан бөлек, «Ақжайық», «Екібастұз», «Ақсу» және «Елімай» командаларында өнер көрсеткен. Өткен жылы павлодарлық команда сапында шабуылшы Екінші лигада 19 гол соққан болатын.