Бүгін облыс әкімдігінде жылыту маусымының қорытындысы шығарылып, алдағы жазға жоспарланған жөндеу жұмыстары талқыланды, деп хабарлайды @Pavlodarnews.kz тілшісі.

Облыс әкімінің баспасөз қызметінің мәліметінше, 2024-2025 жылдардағы жылыту маусымы штаттық режимде өтті, апаттық жағдайлар тіркелген жоқ.

– Қыс өткен екі жылдағыдай қатты аязсыз өтті, ауа райында күрт өзгерістер болған жоқ. Сонымен қатар, қалалардың жақсы дайындалғанын атап өту қажет. Жылу көздерін жаңғырту және желілерді жаңарту жұмыстарының арқасында жылыту маусымы тұрақты өтті. Халықтың шағымдары 55%-ға азайды. Дегенмен, жылу көздеріне қатысты мәселелер әлі де бар. Жаңа маусымға сапалы дайындалу үшін атқаратын жұмыстар көп, – деді облыс әкімі.

Өңір басшысы 1-ЖЭО-дағы апаттық тоқтаулардың көбеюі мен Ақсудың РОК-2 жылу көзіндегі негізгі жабдықтардың тоқтауы салдарынан параметрлердің төмендегеніне назар аударды. Бұл тұрғын үйлердің жылумен жеткілікті деңгейде қамтылмауына себеп болған.

Жиналыста «ЕЭК» АҚ директоры, ЖЭО-1, РОК-2 және Ақсу МАЭС «Энергетика» дивизионының бас операциялық директоры Дүйсен Мерғалиев негізгі мәселе ЖЭО-1-дің №1, 5 және 6 қазандықтарының жиі апаттық жөндеуге шығуында екенін мәлімдеді. Осындай жағдайлардың қайталануын болдырмау үшін биыл ЖЭО-1 станциясын жөндеуге 13 миллиард теңге бөлінді. Бұған қоса, негізгі қазандықтарды жөндеуден бөлек, РОК-2-де қосымша 1,5 миллиард теңгеге қосалқы жабдық жаңартылмақ.

Энергетика және тұрғын үй-коммуналдық шаруашылық басқармасының басшысы Ержан Иманзаиповтың айтуынша, өңір тұрғындарын сапалы жылумен қамту және алдағы жылыту маусымында жылу желілеріндегі гидравликалық және температуралық режимдерді жақсарту мақсатында 16,1 миллиард теңгеге 31 шақырымнан астам желіні жаңарту жоспарланған.

– Павлодарда №5 сорғы станциясы салынады, 5 шақырым магистральдық жылу желісі мен 10,6 шақырым кварталішілік желіге күрделі жөндеу жүргізіледі. Екібастұзда ЖМ-2 және ЖМ-7 қайта жаңартылып, жылу желілері жөнделеді. Ақсу қаласында №3, 5, 8 шағын аудандарындағы кварталішілік жылу желілері жаңартылып, күрделі жөндеу жасалады. Облыстың энергия көздерінде 46 негізгі жабдықты жөндеу, 394 дербес және орталықтандырылған қазандықтарды жаңарту жоспарланған, – делінген хабарламада.

Сонымен қатар, облыс әкімі Асайын Байханов ауылдық жерлердегі қазандықтарды жылыту маусымы басталғанға дейін техникалық іске қосуды тапсырды.

Электрмен жабдықтау желілеріндегі апаттар 2,5 есеге төмендегені тіркелді. Дегенмен, барлық апаттық жағдайлардың 30%-ы Баянауыл ауданында орын алған.

– Облыстың электр желілерін жаңғырту жөніндегі Жол картасы аясында 8 жоба іске асырылады. Оның ішінде 3 жоба бойынша Баянауыл ауданы әкімдігі жобалық құжаттаманы әзірлеп, ауданның 22 шақырым электр желілерін жөндеуге бюджет қаражатын бөлуге өтінім берді, – деп хабарлады облыс әкімінің баспасөз қызметі.

Жөндеу науқаны аясында электр желілерінде 2,1 мың шақырым электр қуатын тасымалдайтын желі мен 712 бірлік жабдық жөндеуден өтеді. Сонымен қатар, Павлодар, Екібастұз және Ақсу қалаларында 18 шақырым сумен жабдықтау және су бұру желілеріне күрделі жөндеу мен қайта жаңарту жұмыстары жүргізіледі.

Облыс әкімі коммуналдық нысандарды жөндеуден кейін бұзылған жерлерді уақытында қалпына келтіру қажеттігін ескертті.

«Павлодар жылу желілері» ЖШС бас директоры Марат Иманаев гидравликалық сынақтардың жоспарымен бөлісті:

– Павлодарда ең жоғары температуралық сынақтар 15 сәуірден, беріктікке сынау 24 сәуірден басталады. Екібастұзда температуралық сынақтар 15 сәуірден, гидравликалық сынақтар 17 сәуірден басталады. Ақсуда температуралық сынақтар 16 сәуірден, гидравликалық сынақтар 21 сәуірден жүргізіледі. Жылыту маусымы алдындағы сынақтар 28 шілде – 6 тамыз аралығында өтеді, – деп мәлімдеді ол.

Өңір басшысы сынақ мерзімдерін түзетіп, оларды мамыр мерекелеріне дейін аяқтауды, тұрғындардың ыстық сусыз қалу уақытын барынша қысқартуды тапсырды. Сондай-ақ, тәуекелдерді болдырмау үшін сынақтардың өту барысын бақылауды және жөндеу жұмыстарының кестесін халыққа алдын ала хабарлауды міндеттеді.

Қалалар мен аудандардың әкімдеріне қазандықтарға, жылумен, сумен жабдықтау және су бұру желілеріне күрделі жөндеу жүргізу, әлеуметтік нысандарға көмір сатып алу және жеткізу, барлық нысандарды 1 қыркүйекке дейін толық дайындау, гидравликалық сынақтарды уақытында өткізу және анықталған ақауларды жою тапсырылды.