Жол-көлік оқиғасы салдарынан зардап шеккендер жоқ, деп хабарлайды  @Pavlodarnews.kz тілшісі.

Облыстық полиция департаменті баспасөз қызметінің мәліметінше, 29 қаңтарда Шарбақты ауданының Шарбақты ауылында Вокзальная – М. Тархан көшелерінің қиылысында ГАЗ-53 маркалы көліктің жүргізушісі маневр жасаған кезде МТЗ маркалы трактормен соқтығысқан.

– Жүк көлігінің жүргізушісі маневр жасау ережелерін бұзғаны үшін жауапқа тартылып, айыппұл салынды, – деді департаментте. 

Трактор иесіне оқиға салдарынан көлікке келтірілген материалдық залалды өтеу үшін азаматтық тәртіпте сотқа жүгіну ұсынылды. 

Сондай-ақ, Атамекен – Курчатов автожолында, Ақсу ферроқорытпа зауытының жанында «Toyota Carina Е» автокөлігінің жүргізушісі рөлді басқара алмай, жарықтандыру бағанасына соғылған. Жүргізушінің мас күйінде болғаны анықталды. Жол-көлік оқиғасына қатысты материал толтырылып, сотқа жіберілді. Автокөлік арнайы тұраққа қойылды.