Аймақтағы кәсіпорындар білікті мамандарға сұранысты арттырып келеді, деп хабарлайды @Pavlodarnews.kz.

Облыстық білім басқармасының басшысы Самал Айтқазинаның айтуынша, 33 колледж 52 жұмысшы біліктілігі бойынша мамандар даярлайды. Ал осы мамандықтарды меңгергісі келетін жастардың саны жылдан-жылға өсіп келеді.

– Биыл мемлекеттік білім беру тапсырысы айтарлықтай ұлғайды. Қазіргі уақытта 6200 студент жұмысшы мамандықтар бойынша білім алуда. Бұл үш жыл бұрынғы көрсеткіштен 37%-ға жоғары. Жастар еңбек нарығында сұранысқа ие мамандықтардың маңызын түсініп, жұмысшы мамандықтарға назар аударуда. Көрсеткіш жыл сайын артып отырмақ, – деп атап өтті Самал Айтқазина.

Соңғы жылдарда жүргізілген талдау көрсеткендей, түлектердің 75%-ы бірден аймақтағы өнеркәсіптік кәсіпорындарға жұмысқа орналасады. Қалғандары жоғары оқу орындарында білімін жалғастырады немесе Отан алдындағы борышын өтеуге аттанады.

–  Әр колледж түлектерінің еңбек нарығындағы жолын бақылауға міндетті. Үш жыл бойы біз мемлекеттік тапсырыс бойынша оқыған жастардың кәсіби бағытын қадағалаймыз. Оқу орындарының директорлары әр студент бойынша жылына екі рет есеп береді, – дейді басқарма өкілдері.

Білім сапасын арттыруда маңызды факторлардың бірі – инфрақұрылым. Облыста 32 колледж жанындаға жатақханаларда шамамен 4000 студент тұрады.