Оқулықтардың алғашқы легі жаңа оқу жылында оқушылардың қолында болады, деп хабарлайды @Pavlodarnews.kz тілшісі.

«Арман-ПВ» баспасының редакторы Юлия Корешкованың айтуынша, жаңа басылымдардың қатарында үшінші сыныпқа арналған қазақ тілі, математика және дүниетану оқулықтары бар. Дүниетану пәніне арналған жинақ оқулық пен жұмыс дәптерінен тұрады.

– Осы оқулықтардың ішінде 2027 жылдың қаңтарында жарық көретін тоғызыншы сыныпқа арналған оқулықтардың орны ерекше. Олардың авторлары – №3 гимназияда жұмыс істейтін павлодарлық педагогтер, – деді Юлия Корешкова.

Жаңа оқулықтар мазмұнымен ғана емес, цифрлық технологиялардың қолданылуымен де ерекшеленеді. Дәстүрлі оқу материалдары интерактивті мүмкіндіктермен толықтырылған.

Оқулықтарда QR-кодтар қарастырылған. Олардың көмегімен оқушылар қосымша материалдарға өтіп, интерактивті тапсырмаларды орындап, бейнематериалдар көріп, аудио тыңдай алады. Сондай-ақ дауыстық көмекшілер мен анимациялар қолданылады.

– Математика оқулығы – Smart-оқулық. Ол толығымен интерактивті басылым болып табылады және «Кітап KZ» электронды платформасына да орналастырылған, – деді баспа өкілі. – Цифрлық мүмкіндіктер оқушыға түсініксіз тақырыпқа қайта оралып, қосымша тапсырмалар арқылы біліміндегі олқылықтардың орнын толтыруға мүмкіндік береді.

Оқу әдебиеттерімен қатар, көркем және тарихи басылымдар да таныстырылды. Олардың арасында Абайға, әскери тақырыпқа және Жошы ханға арналған кітаптар бар. Баспада иллюстрациялар жасау кезінде жасанды интеллект мүмкіндіктері де пайдаланылады. Дегенмен дайын материалдарды редакторлар мен суретшілер түзетіп, өңдейді.

Осылайша, жаңа оқу материалдары білім берудегі дәстүрлі тәсілді цифрлық технологиялармен ұштастырып, оларды әзірлеуге Павлодар өңірінің мамандары да барған сайын белсенді қатысып келеді.