Хасар Хабылбеков қаланың мектепке дейінгі мекемелері мен мектептерінде жөндеу жұмыстарын жүргізу мәселелері бойынша жиын өткізді, деп хабарлайды @Pavlodarnews.kz.

Облыс әкімі Асайын Байханов мектептер мен балабақшалардың жай-күйіне, сондай-ақ жөндеу жұмыстарының сапалы әрі уақытылы орындалуына ерекше көңіл бөледі. 

– Ағымдағы жылы Павлодар қаласында білім беру саласындағы 11 нысанды күрделі жөндеуден өткізу бойынша 15 жобаны жүзеге асыру жоспарланған. Атап айтқанда, Әлімбаев атындағы ЖОББМ, №24, №29, №41 мектептер және №11, 25, 38, 79, 112, 116, 53 бөбекжай-балабақшалары, – деп атап өтті қала әкімі Хасар Хабылбеков.

Жобалар шеңберінде №24 және №41 мектептерде жылу жүйесін жаңарту, №29 мектепте электрмен жабдықтау, сумен қамту, кәріз жүйелері мен ішкі кабинеттерді жөндеу, №41 мектепте электр жабдықтары мен жарықтандыруды жаңғырту, сондай-ақ Әлімбаев атындағы мектеп ғимаратына күрделі жөндеу жүргізу көзделген. №11, 25, 38, 79, 112 және 116 балабақшаларында терезелерді ауыстыру, ал №53 бөбекжай-балабақшасында шатыр мен терезелерді жөндеу жоспарланып отыр.

Шаһар басшысы жөндеу жұмыстарының нақты мерзімдерін айқындауды, жөндеу кезеңінде жекелеген мектептерді екі ауысымдық оқу режиміне көшіру мәселесін пысықтауды, сондай-ақ жөндеу жүргізілетін мектепке дейінгі ұйымдардағы балаларды өзге балабақшалардан орынмен қамтамасыз етуді тапсырды.