Жедел жәрдемнің фельдшерлік бригадасы реанимацияны сәтті өткізді, деп хабарлайды @Pavlodarnews.kz тілшісі.

Жедел жәрдем желісіне шұғыл шақыру 26 қаңтарға қараған түні қала маңындағы Теміржолшылар ауылынан түскен. 53 жастағы ер адам жүректің қатты ауырсынуына шағымданған. Диспетчер көрсетілген мекенжай бойынша жақын маңдағы фельдшерлік бригаданы жіберген. 

Дереу жеткен дәрігерлер жүрегі тоқтап қалған науқасқа алғашқы медициналық көмек көрсеткен. Ер адам инфаркт алған. Бригада дереу дефибриллятор қолдана отырып, жүрек-өкпе реанимациясын жасаған. Мамандандырылған жүрек тобы келген кезде науқастың жағдайы тұрақтанған. Ер адам аймақтық кардио орталығына жеткізілді. 

– Біздің қызметіміздің әрбір қызметкері алғашқы көмек, соның ішінде реанимациялық әдіс көрсете алады, –  дейді облыстық жедел жәрдем станциясы басшысының орынбасары Ольга Вербовая. –  Ол үшін 103 қызметінің барлық қызметкерлері шұғыл көмек көрсетудің халықаралық стандарттарына оқытылады және тиісті сертификаттар алады. Дәрігерлер мен жедел жәрдем фельдшерлерінің реанимацияны сәтті жүргізуі бұл процестің тиімділігін көрсетеді. 

Айта кетерлігі, егер 2023 жылы 103 қызметінің табысты реанимациясының үлесі 74,1 пайызды құраса, өткен жылы статистика 76,9 пайызға дейін көтерілді. Бұл – бүкіл Қазақстан бойынша ең үздік көрсеткіш.