Кездесуде еріктілердің тундраны тазарту және қойөгіздерге арналған қоршау салу тәжірибесі таныстырылады, деп хабарлайды @Pavlodarnews.kz тілшісі.

Павлодар география үйінің мәліметінше, 11 қазанда Торайғыров университетінде кезекті «Жайлы кеш» кездесуі өтеді. Бұл жолы қатысушылар Арктикадағы экологиялық экспедицияның қалай өткенін біле алады.

– Кештің қонағы – Арктика еріктісі Лидия Кармишина. Ол Ямал-Ненец автономиялық округіндегі Морозов кордонына жасалған сапары туралы әңгімелейді. Экспедицияға 13 ерікті қатысқан. Олар аумақты қоқыстан тазарту және қойөгіздерге арналған қоршау салу жұмыстарымен айналысқан, – деді ұйымдастырушылар.

Іс-шараны Павлодар география үйі мен Торайғыров университетінің география және туризм кафедрасы бірлесіп ұйымдастырады.

Кездесу 11 қазанда сағат 14:00-де басталады. Өтетін орны – Ломов көшесі, 64 мекенжайындағы Торайғыров университетінің бірінші қабатындағы кітапхананың коворкинг залы.

Кіру тегін.