Іс-шара қалалық орталық Мәшһүр Жүсіп мешітінде өткізілді, деп хабарлайды @Pavlodarnews.kz тілшісі.

Бұл – ҚМДБ-ның биылғы «Ислам және дәстүр құндылығы» жобасына орай «Мүфтият» баспасынан жарық көрген «Дін мен дәстүр» кітабының үшінші танытымы. Кездесуге мешіттің белсенді жамағаты, қаланың құрметті, абыройлы ақсақалдары мен қариялары қатысты.

Кітапта сан ғасыр бойы халқымыздың тұрмысында қалыптасқан салт-дәстүр, әдет-ғұрып жан-жақты қамтылып, оның асыл дінімізбен ұштасқан тұстары сараланып берілген.

Еңбек «Дәстүрдің ұлттық құндылығы» дін мен дәстүрдің тәрбиелік мәні, «Дәстүр – ізгі қоғам негізі», «Тәрбиеге толы дәстүрлер», «Салт-дәстүр еңбекке жетелейді», «Тыйымдар мен ырымдардың мән-мағынасы» атты тарауларға бөлінген.

Бірінші тарауы бойынша Павлодар облысының бас имамы Жолдас қажы Қоспақұлы, екінші тарауы бойынша Нұршат қажы Нұрғалиева, үшінші тарау бойынша облыстық қажылар қауымдастығының төрайымы Айжан қажы Әпсаттарова, төртінші тарау бойынша облыстық «Ақсақалдар алқасы» қоғамдық бірлестігінің мүшесі, Қадыр қажы Ажымұратов, бесінші тарау бойынша Мәшһүр Жүсіп мешітінің кітапханашысы Назым Шайкенова түсінік беріп, баяндамалар жасады.

Соңында бас имам Жолдас Қоспақұлы дәстүрлі дінімізді, ата-бабамыздың ғасырлар бойы ұстанып келе жатқан діни жолы, төл мазһаб, ұлттық құндылықтар мен қазақы болмысты сақтап қалудың қажеттілігі туралы айтып, аталмыш құнды еңбекті оқу, жас ұрпаққа дәріптеп насихаттаудың маңызын шараға қатысушыларға түсіндіріп, сұрақтарға жауап берді.