М.Әуезов атындағы Қазақ ұлттық драма театры Мұхтар Әуезовтың аталмыш трагедиясын көрермендердің назарына ұсынды, деп хабарлайды @Pavlodarnews.kz тілшісі.

Еліміздегі бас театрдың гастрольдік сапары аясында Жүсіпбек Аймауытов атындағы қазақ музыка-драма театрында ескірмес ескі де есті туынды «Еңлік-Кебек» пьесасы павлодарлық көрерменге жол тартты.

Қойылымның қоюшы-режиссері – Қазақстанның еңбек сіңірген қайраткері Әлімбек Оразбеков. Ал екі жастың рөлін Әділет Базарбай мен Захира Рахымжан сомдады. Абыз бейнесін Қазақстанның еңбек сіңірген қайраткері Бекжан Тұрыс алып шықты. Бұдан бөлек, актерлік құрамда Райымбек Бекет, Саят Мерекеұлы, Болат Әбділманов, Асылбек Боранбай, Мұрат Нұрәсілов, Қасым Демеу, Омар Қыйқымов, Бауыржан Манжігітов бой көрсетті. 

Шығарма 1922 жазылып, 1943 жылы жаңа нұсқада жарық көрген. Деректерге жүгінсек, автор бұл шығарманы 21 жасында жазған. Қазір «Еңлік-Кебек» туындысының бірнеше нұсқасы бар. 

– Пьеса – бүгінге дейін жеткен Мұхтар Әуезов туындыларының ішіндегі жауһары. Мұхтар Әуезов атындағы Қазақ Ұлттық  театры  алғаш рет аталмыш қойылым арқылы сахна шымылдығын ашқан болатын. Осындай классикалық шығармадан рөл алғаныма қуаныштымын, – дейді Есен батырдың рөлін сомдаған театр актері Қасым Демеу.

Қасым Демеу – Батыс Қазақстан облысы Ақжайық ауданының тумасы. Жас актер 2014 жылы жылы мектеп бітіріп, Т. Жүргенов атындағы Қазақ Ұлттық өнер академиясына Асанәлі Әшімовтың шеберханасына оқуға түседі. 2018 жылы оқуды бітіргеннен кейін, Мұхтар Әуезов атындағы Қазақ ұлттық драма театрына қабылданды. Сондай-ақ, Асанәлі Әшімов шәкірттерінен құралған «Жаңа ғасыр» театрында жұмыс істеді. 2022 жылдан бастап, қара шаңырақ театрға жұмыс істеуге оралып, күні бүгінге дейін сахнада өнер көрсетіп жүр.

Оның айтуынша, «Еңлік-Кебек» пьесасы ұлтық театрда бірнеше рет қойылған болатын. 

– Есен – найман батырдың рөлін сомдадым. Әрине, үлкен сенім артылды. Ол сенімді ақтау деген қобалжу бар. Бүгінде осы спектакльді Кереку, Баян өлкесіне алып келе жатқанымызға бақыттымыз. Баян өңірінің табиғаты – керемет. Бізді жылы қарсы алды, – деп бөлісті спикер. 

Өнер майталманының сөзінше, кез келген жұмыстың оңайы жоқ демекші, қиындықтары мен қызықтары болды. Үлкен спектакльде рөл сомдау Қасым Демеу үшін баға жетпес тәжірибе болды. 

– Бұл жерде Есенді басқаша кейіпкер ретінде көрсетеді. Ол барлық негативті оқиғаларға себепкер болады, – деп атап өтті М.Әуезов атындағы Қазақ ұлттық драма театрының актері Қасым Демеу.

Актердің ойынша, ер адам сөзіне берік болуы маңызды. Қызға көңілі түссе – жүрегін жаулап алу мақсатымен махаббат үшін күресуі керек. Оның сомдаған кейіпкері де махаббаты үшін соңына дейін барады.

Қойылымда Еңлік пен Кебекті жағымды кейіпкерлер ретінде сомдайды. Ал Есен – жағымсыз кейіпкер. 

– Шындығында, ол да – бақыты үшін күрескен жігіт, – дейді актер.

 Айта кетейік, «Еңлік-Кебек» пьесасының ерекшелігі – бір ғана әйел адамның сахнада өнер көрсетуі болды. Еңліктің рөлін сомдаған өнер иесі – Захира Рақымжан. Қалған кейіпкерлер – ер адамдар. Жалпы алғанда, 20-ға жуық ер адам өнер көрсетті. 

– Ер адамдардың арасында жалғыз әйел кейіпкері ретінде ойнаймын. Бұл рөлдің өз ауырлығы бар. Себебі, классикалық туындыны арқалап, сенім артқаннан кейін, оны ақтау – қиын. Мақсатым – ел алдында Еңлік образын толықтай ашып, көрермендердің жүрегіне жету, – дейді Захира Рақымжан.

Өнер кейіпкері гастрольдық сапардың алғашқы күнінде «Қара» драмасында бой көрсеткен болатын. 

Оның айтуынша, Павлодар қаласының ескі Алматымен ұқсастығы бар. Қаламыздың табиғаты – керемет. Ауа-райының құбылмалы болуы Алматыны еске түсірсе керек. 

– Таңертең салқын болып, түскі уақытта жылынады. Біздерді күшті қарсы алып жатыр. Рақмет, барлығы ұнап жатыр, – деп жас актриса жылы лебізін білдірді.

Алдағы уақытта алматылық қонақтар павлодарлықтар назарына Бернард Шоудың «Сүйікті менің періштем» және Дулат Исабековтың «Жүз жылдық махаббат» қойылымдарын ұсынады.