Матчтар голдардың көптігімен өткір және қарқынды күресте өтті, деп хабарлайды @Pavlodarnews.kz тілшісі.

Қалалық білім беру бөлімі баспасөз қызметінің мәліметінше, 7-10 маусым аралығында «Жазғы POV-2024» жазғы бағдарламасы және «Заң» азаматтық-құқықтық мектебі аясында «Павлодар дарыны» бос уақытты қамту және балалардың дарындылығын дамыту орталығы «Әр қадаммен: өзіңе апарар жол» шағын футбол турнирін ұйымдастырды. 

Турнир №18 жалпы орта білім беретін мектептің спорт алаңында бес іріктеу кезеңінен тұрды.

– Жарысқа қалалық №2, 5, 6, 7, 11, 14, 18, 27, 41, 46, Малайсары батыр, Қ.Бекқожин, М.Әлімбаев, Қ.Мақпалеев, Ж.Тәшенев, М.Әуезов, М.Жүсіп, С.Торайғыров атындағы мектептер, А.Шәмкенов, Ә.Бөкейхан атындағы мектеп-лицейлер, Жетекші, Кенжекөл мектептерінің 5-8-сынып оқушылары қатысты. Қатысушылар саны – 224, – дейді ұйымдастырушылар.

Финалға №2, 41, Қ.Мақпалеев, А.Шәмкенов, М.Жүсіп мектептерінен 5 команда өтті. 

– Турнир кіші-футбол ережелеріне сәйкес, олимпиадалық жүйе бойынша өтті. Ойында жеребе арқылы матчтардың реттілігі анықталды. Командалар төрт алаңнан және қақпашыдан тұрды. Әр матч екі таймнан 12-15 минуттан өтті, – деді №7 мектептің бас төрешісі, дене шынықтыру пәнінің мұғалімі Ермек Бозтаев.

Финалдық ойындардың қорытындысы бойынша № 41 мектептің командасы І орынды және «Ауыспалы кубокты», М.Жүсіп атындағы мектептің командасы ІІ орынды, №2 мектептің командасы ІІІ орынды иеленді. «Үздік шабуылшы» аталымын М.Жүсіп атындағы мектептің оқушысы Мерлан Сәлім, №41 мектептің оқушысы Юрий Ислам «Үздік қорғаушы» аталымы және №2 мектептің оқушысы Камариден Әсет «Үздік қақпашы» аталым иегерлері атанды.

Барлық финалистер орталықтың дипломдарымен және медальдарымен марапатталды.