Жаңа мәзір оқушыларға сүт өнімдері, жемістер, ет тағамдары, жаңғақ сияқты өнімдерді енгізуді көздейді, бірақ қазіргі бюджет жеткіліксіз, деп хабарлайды @Pavlodarnews.kz тілшісі.

Облыстық кәсіпкерлер палатасына өңірдің тамақтандыру жеткізушілері атынан «Бөлшек сауда және қоғамдық тамақтандыру қауымдастығы» заңды тұлғалар мен жеке кәсіпкерлердің республикалық бірлестігі вице-президенті Марина Лаптева мектептегі тегін тамақтандыруды ұйымдастырудағы қиындықтарға байланысты жүгінді. Оның өтініші бойынша «Атамекен» ӨКП-де мемлекеттік органдармен бейнеконференция-кездесу ұйымдастырылды.

Сарапшының айтуынша, Денсаулық сақтау министрлігі бекіткен жаңа стандарт бойынша оқушыларға сүт өнімдері, жемістер, жылқы етінен дайындалған тағамдар, жент, қазы қосылған тұздық, бұршақ бұрышы, жаңғақ сияқты жаңа өнімдер енгізіледі. Дегенмен, бұл талаптарды орындау үшін жергілікті бюджеттен қосымша қаржы қарастырылмаған. Қазіргі таңда Павлодарда бір оқушыға тамаққа 586 теңге бөлінсе, жаңа мәзірдің нақты құны күніне кемінде 900 теңге болады.

Қауымдастықтың технологы жаңа мәзір бойынша 1–4-сынып оқушыларына қажетті калория, ақуыз, май және көмірсу мөлшерін сақтай отырып, стандартқа сай мәзір әзірлеген. Нәтижесінде бір оқушыға ҚҚС-сыз тамақтану құны 688 теңге деп есептелген. Сарапшы бұл жағдай кәсіпкерлердің құқықтарын қорғаумен қатар, балалардың азық-түлік қауіпсіздігіне де байланысты екенін атап өтті.

Білім басқармасы басшысының орынбасары Әлия Әубәкірова жаңа төрт апталық перспективалық мәзірді облыстық денсаулық сақтау басқармасы 24 шілдеде бекіткенін растады.

– Егер ұсынылған мәзірдің бірін бекітсеңіз, кейбір мәселелер туындайды. Мысалы, өрік пен сүтті, қияр мен сүтті бірге беру ас қорыту тұрғысынан қиындық туғызуы мүмкін. Біз жедел түрде жұмыс тобын құрып, облысқа бейімделген нұсқаны қарауды ұсынамыз. Дайын нұсқа бар, оны eotinish.kz арқылы мемлекеттік органдарға талаптарға сәйкес жолдадық, – деді Марина Лаптева облыстық денсаулық сақтау басқармасының өкілдеріне.

Кездесуде жұмыс тобын облыстық денсаулық сақтау басқармасы құрауы және құрамына Павлодар облысы Кәсіпкерлер палатасының өкілі кіретіні бекітілді. Мәзірді жақын күндері қарау жоспарланып отыр.

Облыстық кәсіпкерлер палатасы директорының міндетін атқарушы Жомарт Сембаев «Атамекен» тарапынан қолдау көрсетілетінін айтты.