Онкологиялық диагнозбен диспансерлік есепте тұрған облыс тұрғындарына біржолғы көмек көрсетіледі. Біржолғы жәрдемақы мәселесін медициналық ұйымдар емес, жергілікті мәслихаттар шешеді. Оны қалай алуға болатынын, қандай құжаттар қажет екенін @Pavlodarnews.kz тілшісіне Павлодар қалалық жұмыспен қамту және әлеуметтік бағдарламалар бөлімінің бас маманы Айсұлу Құсайынова айтып берді.

Төлем сомасы

Барлық сатыдағы қатерлі ісікке шалдыққан павлодарлықтарға әлеуметтік көмек жылына бір рет тағайындалады. Сомасы – 10 АЕК, немесе 36 920 теңге.

Қандай құжаттар қажет

– аутентификация үшін жеке куәліктің түпнұсқасы;

– 20 таңбалы банк шотының ашылғаны туралы хабарлама;

– облыстық онкологиялық диспансерден № О26 анықтамасы.

Консультацияны Кривенко көшесі, 25, №3 кабинетте орналасқан «Open Pavlodar» фронт-офисінде немесе  8 (7182) 32-57-80, 32-03-83 телефондары бойынша алуға болады.

Диагнозды дәрігерлік-консультациялық комиссия растайды. Құжат – № О26. Оны алу үшін Российская көшесі, 57/3 мекенжайында орналасқан онкологиялық диспансердің әлеуметтік қызметкеріне хабарласу керек.  Маман жұмыс күндері сағат 08:00-ден 17:00-ге дейін кезек бойынша жұмыс істейді.

Биылғы жылдың басынан бері 4200 адам әлеуметтік көмек алған, бұл – 2023 жылдың алты айымен салыстырғанда 20 пайызға артық. Алты айда облыстың 13 545 тұрғыны онкологтардың тіркеуіне алынды.