Мердігерлер соңғы жұмыстарды іске асыруда, деп хабарлайды @Pavlodarnews.kz.

Бұл туралы Павлодар қаласының әкімі Хасар Хабылбеков өзінің Instagram парақшасында жазды.

- Биыл облыс әкімі Асайын Байхановтың қолдауымен 10 шағын саябақ және 18 шағын футбол алаңын абаттандыруды бастадық. Біздің міндетіміз – қала тұрғындары үшін барынша көп демалыс орындарын құру. Ыңғайлы болу үшін жаңа саябақтар Павлодардың әртүрлі шағын аудандарында орналасқан. Оларды абаттандыру жұмыстары аяқталуға жақын, - деп жазды шаһар басшысы. 

Айтуынша, саябақтар мен алаңдарға кесек тас төселіп, орындықтар, қоқыс жәшіктері, шамдар орнатылған. Ал жарықтандыруды осы айдың соңына дейін қосамыз деп сендіруде.

- Павлодарда бұқаралық спортты дамыту мақсатында жыл сайын жаңа спорт нысандары ашылады. Қалада 27 шағын футбол алаңы болса, биыл бұл алаңдардың саны 18-ге артады. Маусым айында басталған құрылыс кезең-кезеңімен жүргізілуде. Қазірдің өзінде 14 мекенжайда іргетасын дайындау жұмыстары аяқталды, 4 алаңда қоршау бағаналары орнатылуда, - деп толықтырды қала әкімі. 

Жалпы, 20 қазанға дейін алаңдарды салу жұмысын толық аяқтау жоспарлануда.