Көрмеде қолөнер шеберлері жасаған түрлі бұйымдар қойылды, деп хабарлайды @Pavlodarnews.kz тілшісі.

Жастар бастамаларын дамыту орталығының мәліметінше,  жағалаудың жоғарғы бөлігінде ұйымдастырылған «Арбат-2023» жазғы жастар көрмесінің мақсаты – жас кәсіпкерлерді қолдау.

–  «Арбат-2023» қолөнершілер жәрмеңкесі қолөнер және сәндік-қолданбалы өнер дәстүрлерін сақтауға ықпал етеді. Сондай-ақ қала тұрғындарын шығармашылықтың таңғажайып әлемімен танысып,  өздеріне ұнайтын заттарды алуға   мүмкіндік береді, – дейді ұйымдастырушылар. 

Келушілердің назарына қолөнершілердің түрлі ұлттық туындылары, сондай-ақ қолданбалы өнер мен қолмен жасалған үлгілері ұсынылды.  Оның ішінде қыз-келіншектерге арналған зергерлік бұйымдар, ою-өрнекпен безендірілген, қазіргі күні жастар арасында трендке айналған тақиялар, түрлі мультфильм кейіпкерлерінің суреттері салынған тәтті печеньелер бар.