Бұл шара жетім және ата-ана қамқорлығынсыз қалған балаларға арналған ұйым тәрбиеленушілері арасында ұйымдастырылды, деп хабарлайды @Pavlodarnews.kz  тілшісі.

Павлодар облысы білім басқармасының мәлімдеуінше, балалар фестивалі М.Катаев атындағы облыстық оқушылар сарайында өтті.  Өнер додасына 6-17 жас аралығындағы 46 бала қатысады. 

- Фестивальдің мақсаты – жетім балалар мен ата-ана қамқорлығынсыз қалған балалардың шығармашылық қабілеттерін дамыту, өз халқының этномәдениетін зерделеу. Іс-шара Алғыс айту күніне арналған «Ризашылық – мейірімділік бұлағы» жалпыұлттық мәдени-білім беру жобасы аясында өткізілді, - делінген хабарламада.

Шара үш бағыт бойынша өткізілді. Яғни «Татулықтың тұтқасы - бірліктің бесігі» халық билері байқауы, «Жүрек жылуы» вокалистер жарысы және «Ризамын халқыма!» музыкалық-театрландырылған қойылымдар бәйгесі (мюзикл). 

Фестиваль қорытындысы бойынша хореография бойынша 1-орынға Екібастұз қаласының өмірлік қиын жағдайдағы балаларды қолдау орталығы ие болса, 2-орынды Кенжекөл ауылының отбасылық үлгідегі балалар ауылы, 3-орынды Павлодар қаласының отбасылық үлгідегі балалар ауылы еншіледі.

"Вокал" бағытында (кіші топ) 1-орынды өмірлік қиын жағдайға тап болған балаларды қолдаудың өңірлік орталығы мен Павлодар қаласының №2 арнайы мектебі өзара бөлісті. 2-орын Павлодар қаласының отбасылық үлгідегі балалар ауылының еншісіне  бұйырса, 3-орынды Кенжекөл ауылының отбасылық үлгідегі балалар ауылы қандығалады. 

Ал "Вокал" бағытында орта топта 1-2 орынды Екібастұз қаласының өмірлік қиын жағдайдағы балаларды қолдау орталығы иеленді. Үздік үштікке отбасылық үлгідегі Шақат балалар үйі лайық деп танылды.  

Сонымен қатар, "Мюзикл"бағытында 1-орын Екібастұз қаласының өмірлік қиын жағдайдағы балаларды қолдау орталығына бұйырса, 2-орын Кенжекөл ауылының отбасылық үлгідегі балалар ауылына тиесілі болды.

Жеңімпаздар бағалы сыйлықтармен марапатталды.