Марапаттау рәсімі Алматы қаласында өтті, деп хабарлайды @Pavlodarnews.kz тілшісі.

Ақпараттық технологиялар колледжінің алғашқы әскери және технологиялық дайындық пәні мұғалімі Нұрлан Нұрпейіс «Үздік АӘжТД пәні мұғалімі-2024» номинациясының жеңімпазы атанды. Сондай-ақ жыл бойы байқаулардың қорытындысы бойынша жыл үздігін бағалауда ақпараттық технологиялар колледжі «Үздік әскери-патриоттық ұйым-2024» номинациясына ие болды. Колледж басшысы Серік Жартыбаевтың атынан марапатты алғашқы әскери және технологиялық дайындық мұғалімі Әделхан Құлмұратов алды.

–    Оқу орнының студенттері жыл сайын Екібастұз, Алматы, Астана, Павлодар қалаларында өткен әскери-жетекшілер арасындағы жарыстарда бірінші орынды иеленіп келеді. Қараша айында Қаныш Имантайұлы Сәтбаевтың 125 жылдығына орай республикалық жарыс өткізіп, «Еліміздің ең үздік әскери-патриоттық ұйымы» деген номинациясын жеңіп алдық, – деп қуанышымен бөлісті Нұрлан Нұрпейіс.

Еске сала кетейік, ақпараттық технологиялар колледжінің командасы WorldSkills Kazakhstan-2024 республикалық чемпионатында күміс медаль және екі медальонға ие болған.

Ақпараттық технологиялар колледжі 1969 жылы құрылған. Білікті мамандарды даярлау үшін колледжде қажетті материалдық-техникалық база және жайлы жатақхана бар. Колледжде робототехника, 3D – модельдеу, Электротехника бойынша оқу шеберханалары мен ғылыми-практикалық зертханалар, спорт залы, тренажер залы, асхана, мәжіліс залы бар.

Оқу орнында заманауи білім беру процесінің барлық талаптарына жауап беретін облыстағы жалғыз it HUB білім беру кеңістігі құрылған. Студенттер алуан түрлі және өзекті білім алып, IT-нарығының жаңалықтарымен танысып, бизнес-серіктестер табады.