Өңірде пәтер ұрлығы көбіне үй иелері жұмыста немесе қала сыртында болған кезде жасалады, деп хабарлайды @Pavlodarnews.kz тілшісі.

Облыстық полиция департаментінің мәліметінше, жыл басынан бері өңірде 35 пәтер ұрлығы тіркелген. Жедел қызметкерлер оның 32-сін ашты.

Қаскөйлер тұрғын үйге әртүрлі жолмен кіреді. Олар құлыпты бұзуы, кілт таңдауы, терезе арқылы енуі немесе пластикалық терезені күшпен ашуы мүмкін. Көбіне ақша, зергерлік бұйымдар және басқа да бағалы заттар ұрланады.

Полицияның мәліметінше, мұндай қылмыстардың басым бөлігі күндіз, тұрғындар жұмыста немесе қала сыртында болған уақытта жасалады.

– Бағалы заттарды қараусыз қалдырмауға, дәліздер мен кіреберістерді бейнебақылау камераларымен жабдықтауға, есіктерді берік құлыптармен күшейтуге және есікті тіпті қысқа уақытқа да ашық қалдырмауға кеңес береміз, – деп хабарлады ведомстводан.

Мүлікті қорғаудың тағы бір тәсілі – күзет дабылын орнатып, пәтерді күзет пультіне қосу.

Тәртіп сақшылары көршілермен жақсы қарым-қатынаста болудың да маңызына назар аударды. Үй иесі ұзақ уақытқа кеткен кезде көршілер пәтерді бақылап, күмәнді жағдай байқалса, дер кезінде хабарлай алады.