Сілеусін – экожүйедегі сирек кездесетін жануар, деп хабарлайды @Pavlodarnews.kz тілшісі.

«Ертіс орманы» резерватында мұндай жыртқышпен кездесіп қалған сәтте қауіпсіздік ережелерін есте сақтау маңызды екенін айтады.

⠀– Сілеусінді кездестіру табиғатты және оны мекендейтін жануарлар мен аңдарды қорғаудың қаншалықты маңызды екенін еске салады. Ол ұсақ жануарлардың санын реттеу арқылы табиғаттағы тепе-теңдікті сақтауға көмектеседі, – дейді резерватта. 

Мұндай сирек кездесетін жануарды көргенде қашықтықты сақтаған дұрыс. Себебі, ол қауіп төніп тұрғанын сезініп, агрессивті әрекет етуі мүмкін.

Кенет қозғалыстар жасап, қатты дыбыстардан аулақ болған дұрыс. Сабырлы түрде бақылап, қашықтықтан фото немесе видео түсіруге болады. Дегенмен тамақтандыруға немесе өзара әрекеттесуге әрекет жасамаған абзал. Сілеусін – адамның көмегін қажет етпейтін жабайы мысық.