Кәсіпкер торт пісіруді сегіз жыл бұрын декреттік демалыс кезінде қолға алған, деп хабарлайды @Pavlodarnews.kz.

Айгүл Оразғалиева сәбиі дүниеге келгенге дейін банкте жұмыс істеген. Ал 2017 жылы кондитерлік жолын бастау үшін шағын болса да, өзінің жеке студиясын ашқан. Бұған дейін тәтті тағамдарды тек үйде дайындаған. Ал төрт жылдан кейін өнімдерін сататын бутикті іске қосқан. Бұдан әрі кәсібі дамып, танымал болған соң жұмыс орнын кеңейту жайлы ой келеді.  

– Қызым дүниеге келген кезде торт пісіру менің құмарлығыма айналды. Отбасымыз да үлкен. Осылайша тәттілерді дайындау сүйікті ісіме айналды. Уақыт өте келе жеке брендім қалыптасып, тапсырыстар саны көбейе бастады. Сол кезден бастап орналасқан жерімді кеңейту керек екенін түсіндім,– деді кәсіпкер.

Айгүл Оразғалиева  арманын жүзеге асыру үшін «2021-2025 жылдарға арналған кәсіпкерлікті дамыту жөніндегі ұлттық жоба» мемлекеттік бағдарламасы шеңберінде 8% жылдық мөлшерлемемен  бес жылға 20 миллион теңгеге несие алып, кондитерлік цех ашқан.  

– Кішкентай ас үйде басталған жұмысым бүгінде үлкен кәсіпке айналды. Мен алған біліміммен қыздармен бөлісіп жүрмін. Арнайы курстарда оларға торт, нан тағамдары мен пісірімдерді дайындауды үйретемін, – деді Айгүл Оразғалиева. 

Кәсіпкер осы уақытқа дейін үш мың адамды оқытып, тәттілерді пісіруге үйреткен. Бүгінде курстардан өткен қыздардың көбі үйден өнімдерінің сатылымымен айналысады.

– Бізде жалпы жеті қызметкер жұмыс істейді. Олар курстарда оқыту процесіне қатысып, цехта тәттілер дайындап, сондай-ақ оны сатумен айналысады, – дейді кәсіпкер.

 Айгүл Оразғалиева желтоқсанда цех орналасқан ғимаратта өз өнімдерін сатуды  жоспарлап жатыр. Бүгінде қалада тек бір сату нүктесі бар.