Халық өкілдері бірлескен іс-шаралар жоспарына қол қойды, деп хабарлайды @Pavlodarnews.kz тілшісі.

Бұл туралы Достық үйінде өткен Қазақстан халқы Ассамблеясымен өзара іс-қимыл жөніндегі депутаттық топтың жұмыс отырысында айтылды. Топты башқұрт қоғамдық мәдени орталығының төрағасы  Рустам Мазгутов басқарды. Облыстық депутаттар тек ассамблея мүшелерімен ғана емес, сарапшылармен, ғалымдармен, қоғам қайраткерлерімен кездесуді жоспарлап отыр. Сайланған өкілдер этномәдени бірлестіктердің іс-шараларына қатысуға ниетті.

–   Облыс тұрғындарының ұлттық бірлік саласындағы мемлекеттік саясатты жақсы түсінуі үшін ақпараттық жұмыс жүргіземіз, – деді топ төрағасы. – Сонымен қатар, біз этносаралық келісімдер саласындағы саясатты жетілдіру бойынша заңнамалық бастамаларды әзірлеуді жоспарлап отырмыз.

Қазақстанның орыс, славян және казак ұйымдары қауымдастығы облыстық филиалының төрағасы Владимир Берковский депутаттарды аудандарда өтетін ҚХА күндеріне қатысуға шақырса, «Жастар» республикалық қоғамдық бірлестігінің облыстық өкілдігінің басшысы Рамиль Смайылов облыс депутаттарына «Суда» бірлескен шығармашылық жоба конференциялары мен арнайы сыныптық конференциялар өткізуді ұсынды.

Депутаттық топ төрағасы этномәдени бірлестіктердің төрағаларына «Қазақстан Республикасы мәслихаттарының 30 жылдығы» төсбелгілерін табыс етті.