Бүлдіршіндер байқауға қатысты, деп хабарлайды @Pavlodarnews.kz.

М.Катаев атындағы Оқушылар сарайында «Адал азамат» біртұтас тәрбие бағдарламасы аясында ұйымдастырылған облыстық «Кәсіптер марафоны» байқауы өтті. Іс-шара оқушылардың түрлі мамандықтарға деген қызығушылығын арттыруға, олардың шығармашылық және практикалық әлеуетін ашуға бағытталды. Әсіресе жұмысшы мамандықтарының қоғамдағы маңызын дәріптеу байқаудың басты мақсаты болды. 

Бұл байқау қатысушыларға өз шеберліктерін көрсетуге, тәжірибелік дағдыларын дамытып, кәсіби ортада өздерін сынап көруге мүмкіндік берді. Оқушылар қолөнер, IT технологиялар, дизайн, аспаздық және экология салалары бойынша нақты жобалар мен шығармашылық жұмыстарын ұсынды. Қазылар алқасы жұмыстарды сапасы, шығармашылық ерекшелігі, практикалық маңызы және тұсаукесер деңгейі бойынша бағалап, әділ кері байланыс берді.

Іс-шараның тәрбиелік мәні де зор болды: жас ұрпаққа еңбекке адалдық, жауапкершілік пен болашақ мамандығын саналы түрде таңдаудың маңызын көрсету басты мақсатқа айналды. Қорытындысында әр номинация бойынша жеңімпаздар дипломдармен марапатталып, барлық қатысушылар сертификат алды.

«Кәсіптер марафоны» жас ұрпақтың кәсіби бағдарын айқындауға, қабілеттерін дамытуға және қоғамға пайдалы, еңбекқор азамат болып қалыптасуына үлкен серпін берген маңызды іс-шара ретінде есте қалды.