Пандемия жүрек-өкпе реанимациясы алгоритміне өзгерістер енгізді, деп хабарлайды @Pavlodarnews.kz тілшісі.

Жедел медициналық көмек көрсету бөлімінің басшысы Игорь Колесниченконың айтуынша, «ауыздан ауызға» жасанды тыныс беру мен прекардиальді соққы жасауға тыйым салынды.

– Дүниежүзілік денсаулық сақтау ұйымының мәліметтері бойынша, жер бетінде әр алты секунд сайын бір адамның жүрегі мен тынысы тоқтайды. Сол адамның отбасына қайта оралуы немесе өмірден өтуі тек жанында болған адамдарға байланысты, – деп атап өтті апаттар медицина орталығының дәрігері.

Алдымен, адам жатқан жердің реаниматор үшін қауіпсіз екеніне көз жеткізу керек – ашық сымдар, төгілген отын, ілулі жүк немесе өткір жарақаттайтын заттар болмауы тиіс. Осыдан кейін үш нәрсені анықтау қажет: ес деңгейі, тыныс алу деңгейі және қан айналымының деңгейі.

– Қазіргі этикалық талаптарға сәйкес, адамның есін анықтау үшін оны беттен ұруға болмайды. Оның орнына, зардап шеккен адамның иығынан сілкіп, қаттырақ дауыстау қажет, – дейді маман. – Егер адам ұйықтап жатқан болса немесе мас күйінде болса, міндетті түрде көзі ашылып, бірдеңе айтады. Кейде бұл бейәдеп сөздер болуы да мүмкін. Егер ол ешқандай реакция бермесе – дауыстық, дыбыстық немесе тактильді – оның ессіз екенін анықтауға болады.

Пандемияға дейін тыныс алу деңгейін анықтау үшін «көремін, естимін, сеземін» әдісі қолданылды: құтқарушы зардап шеккен адамның тыныс алу жолдарына құлағын жақындатып, көкірек қуысына қарап, тынысын тыңдады.

– Қазіргі халықаралық стандарттарға сәйкес, біз тек көкірек қуысының көтерілуін визуалды түрде бақылаймыз. Реаниматологтар жиі киім жібін тыныс алу жолдарына жақындату әдісін пайдаланады: егер адам тыныс алса, жіп қозғалады.

Қан айналымын немесе жүрек соғуын ұйқы артериясынан анықтайды, себебі ол жүрекке жақын орналасқан және тамыр соғысы жақсы сезіледі.

– Зардап шеккен адамның басын бір жағына бұру қажет, – деп кеңес береді дәрігер. – Басты бұрғанда мойында қиғаш бұлшықет пайда болады. Сіз қолайлы қолыңыздың төрт саусағын біріктіріп, мойынның ортасына жақын қойып, сегіз секунд ішінде тамыр соғысының бар-жоғын анықтауыңыз керек.

Игорь Колесниченко атап өткендей, егер есі, тынысы және қан айналымы болмаса, дереу жүрек-өкпе реанимациясын бастау қажет. Жедел жәрдем көлігі кем дегенде он минутта жетеді, ал зардап шеккен адамның бұл уақытқа шыдамауы мүмкін.

«Жүрек нүктесін» қарапайым геометриялық есептеулер арқылы анықтауға болады. Ер адамдарда маңдайдан ішке дейін, ал екінші сызықты емізіктер бойымен ойша жүргізіңіз. Қажетті нүкте екі сызықтың қиылысқан жерінде болады. Әйел адамдарда төс сүйегінің жоғарғы және төменгі шетін визуалды түрде тең екіге бөлу керек.

– Жүрек пен тыныс алу тоқтағаннан кейін алғашқы 3-4 минут ішінде реанимацияны бастасаңыз, оның сәттілік пайызы 60 пайызды құрайды. Әрбір келесі минут, төртіншіден бастап, оң нәтиже ықтималдығын алты пайызға азайтады, яғни төрт минуттан кейін бұл көрсеткіш 54 пайыз болады, – деп ескертеді апаттар медицина орталығының маманы. – Жүрек-өкпе реанимациясының сапасын 15 пайызға жақсарту үшін зардап шеккен адамның аяқтарын 30 сантиметрге көтеру керек, осылайша қан жүрек аймағына қарай ағылады.

Дәрігерлер кеуде қуысына отыз рет басу және екі рет жасанды тыныс беру әдісін қолдануды ұсынады. Өзіңізді қорғау үшін ауызды бірнеше қабатталған дәкемен немесе орамалмен жабу керек. 30:2 схемасын кезектестіріп орындауды жалғастырып, әр бес әрекеттен кейін зардап шеккен адамның тынысы шыққанын тексеріңіз.

Зардап шеккен адам өздігінен тыныс ала бастаған кезде және тамыр соғуы, есі пайда болса, реанимация тоқтатылады. Адамды қырымен жатқызып, медицина мамандарының келуін күту қажет.