Облыста интернет арқылы жасалатын қылмыстар 68 пайызға көбейген. Зардап шеккендердің арасында жастар тіпті оқушылар да бар, деп хабарлайды @Pavlodarnews.kz.

Павлодар облысында интернет алаяқтығы оқиғалары күн сайын тіркеліп жатыр. Құқық қорғау органдарының дерегінше, тәулігіне үш-бес жаңа жағдай анықталады. Залал көлемі 80 мың теңгеден бастап 90 миллион теңгеге дейін жетеді. 2025 жылдың басынан бері жалпы шығын 3,5 миллиард теңгеден асты.

– Он айда өңірде 1973 интернет-қылмыс тіркеліп, олардың 515-і ауыр санатқа жатқызылды. Қылмыстардың өсуіне қарамастан, ашылу көрсеткіші тұрақты деңгейде. 283 іс сотқа жолданды. 28 адам ұсталды, олардың екеуі ұйымдасқан топ құрамында болған, – деді облыстық полиция департаментінің киберқылмысқа қарсы күрес бөлімінің жедел уәкілі Сұлтанбек Кадержанов.

Оның айтуынша, ұсталғандардың арасында студенттер мен екі жасөспірім де бар.

– Алаяқтардың ең жиі қолданатын әдісі – өздерін банк, полиция немесе Ұлттық қауіпсіздік комитетінің қызметкері ретінде таныстыру. Олар «сіздің шотыңызға шабуыл жасалды» деп сендіріп, SMS-кодты сұрап алады. Кейін тағы бір «қызметкер» хабарласып, деректеріңіздің қауіпте екенін айтып, азаматтарды шатастырады. Осылайша адамдар өздері шоттарына қолжетімділікті ашады, – дейді ол. 

Сұлтанбек Кадержанов ешбір банк немесе мемлекеттік орган WhatsApp арқылы хабарласпайтынын ескертеді. Спикердің сөзінше, егер осындай қоңырау түссе, бұл – алаяқтардың әрекеті. Әңгімеден кейін ресми нөмір арқылы банкке өзіңіз қоңырау шалыңыз. SMS-кодтар мен жеке деректерді ешкімге бермеңіз.