Автоматтандырылған жүйенің көмегімен кіріп-шығатын барлық көліктер назардан тыс қалмайтын болады, деп хабарлайды @Pavlodarnews.kz.

Баянауыл мемлекеттік ұлттық табиғи паркі аумағына кіру ақысы бекітілді. Ұлттық парктің директоры Аждар Жүсіповтің айтуынша, былтыр бақылау өткізу бекеті арқылы өту үшін төлемақы 645 теңгені құрады. 

–  Ендігі жылы жаяу жүргіншілер 250 теңгеден төлейді. Төрт бақылау-өткізу бекеті автоматтандырылды. Қызметкерлер екі монитор арқылы кіретін және шығатын көліктерді бақылайды. Біріншісінде шлагбаум алдында тұрған төрт көлік көрінеді. Ал екінші мониторда көліктердің мемлекеттік нөмірлері көрсетіліп, жүйеге ақысы енгізіледі, – деді Аждар Жүсіпов.

Өткізу бекеттерінде екінші деңгейлі банктердің төлем қызметіне қосылған. Яғни, туристер төлемді терминал арқылы да, банктік аударыммен де жасауға болады.

–  Енгізілетін шаралар экологиялық жағдайды жақсартуға, сондай-ақ төлем процесін автоматтандыруға және қорғалатын табиғи аумақтарды пайдалануды тиімді бақылауға бағытталған, – деп сеніммен айтады Аждар Жүсіпов.

2024 жылы ерекше қорғалатын табиғи аумақтарды пайдаланғаны үшін келесідей төлемақы бекітілген: 

•  жаяу жүргінші – 0,1 АЕК (369 теңге);

•  мотоцикл, мопед, квадроцикл үшін – 0,2 АЕК (738 теңге);

•  жеңіл автокөлік – 0,3 АЕК (1 108 теңге);

•  орын саны 16-ға дейінгі дейінгі шағын автобус пен жүк көлігі – 1 АЕК (3 692 теңге);

•  сыйымдылығы 32 орынға дейінгі автобустар – 2 АЕК (7 384 теңге);

•  орын саны 32-ден асатын автобус – 3 АЕК (11 076 теңге).