Сарапшы Тоқаевтың сыртқы саясаты елдің халықаралық беделін күшейтіп отырғанын атап өтті, деп хабарлайды @Pavlodarnews.kz тілшісі inbusiness.kz сайтына сілтеме жасап.

Қазақстан Президенті Қасым-Жомарт Тоқаев Сауд Арабиясының тақ мұрагері Мұхаммед бен Салманды Қазақстанға мемлекеттік сапармен келуге шақыруын растады. Бұл туралы ол Сауд Арабиясының Қазақстандағы елшісі Файсал Әл-Кахтанимен кездесу барысында мәлімдеді. 

Кездесу барысында елші Сауд Арабиясының Қазақстанмен стратегиялық серіктестікті тереңдетуге дайын екенін жеткізіп, Таяу Шығыстағы күрделі жағдайға байланысты Қазақстан басшысының ұстанымына алғыс білдірді.

АҚШ-тың Халықаралық салық және инвестициялар орталығының сарапшысы Уэсли Александр Хиллдің пікірінше, Қазақстан мен Сауд Арабиясы арасындағы қарым-қатынас әзірге бастапқы кезеңде болғанымен, оның әлеуеті жоғары.

– Қазіргі уақытта саяси үйлестіру мен қауіпсіздік саласындағы өзара іс-қимыл шектеулі. Дегенмен мұнай, стратегиялық минералдар және инвестициялар бағытында ынтымақтастықты дамытуға үлкен мүмкіндік бар, – деді сарапшы.

Оның айтуынша, Сауд Арабиясының Орталық Азияға инвестициялық қызығушылығы аймақтағы тұрақтылықпен байланысты. Бұл тұрғыда Қазақстан қолайлы инвестициялық алаң ретінде қарастырылады.

Сарапшы Қасым-Жомарт Тоқаевтың жеке дипломатиялық рөліне де ерекше тоқталды. Оның пікірінше, мемлекет басшысының кәсіби дипломат ретіндегі тәжірибесі Қазақстанның көпвекторлы сыртқы саясатын тиімді жүргізуге мүмкіндік береді.

– Тоқаевтың дипломатиялық тәжірибесі мен теңгерімді саяси ұстанымы Қазақстанға күрделі халықаралық жағдайда сенімді серіктес ретінде қалыптасуға көмектесіп отыр, – деп атап өтті Уэсли Александр Хилл.

Сарапшы сондай-ақ Тоқаевтың Мұхаммед бен Салманға берген жоғары бағасын дипломатиялық тұрғыдан орынды қадам ретінде бағалады. Оның айтуынша, мұндай мәлімдемелер халықаралық қатынастарда өзара сенім мен ынтымақтастықты нығайтуға ықпал етеді.

Сонымен қатар жақында қол қойылған инвестицияларды өзара қорғау туралы келісімдер мен үйлестіру кеңесінің құрылуы екі ел арасындағы байланыстарды институционалдық деңгейге көтерген. Бұл өз кезегінде шетелдік инвестициялар үшін қолайлы әрі болжамды орта қалыптастырады.

– Инвестициялар әрқашан тұрақтылық пен болжамдылықты қажет етеді. Сондықтан мұндай келісімдер тәуекелдерді азайтып, экономикалық ынтымақтастықты нығайтады, – деді сарапшы.

Уэсли Александр Хилл Қазақстанның Таяу Шығыстағы рөліне де тоқталып, елдің бейтарап әрі сенімді делдал ретінде қабылданатынын айтты. Оның пікірінше, Қазақстанның Сирия бойынша Астана процесіне қатысуы және Ауғанстан мәселесіндегі белсенділігі халықаралық деңгейде мойындалған.

Сондай-ақ Қазақстанның Түркістанды Таяу Шығыс бойынша ықтимал бейбіт келіссөздер алаңы ретінде ұсынуы да маңызды бастама ретінде бағаланды.

– Мұндай ұсыныстар әрдайым нәтижелі бола бермейді, алайда бұл Қазақстанның жаһандық тұрақтылыққа үлес қосуға дайын екенін көрсетеді, – деді сарапшы.

Сарапшылардың бағалауынша, Қазақстан мен Сауд Арабиясы арасындағы серіктестіктің тереңдеуі Орталық Азиядағы геосаяси бәсекелестікті жұмсартып, өңірдегі экономикалық және саяси тұрақтылыққа оң әсер етуі мүмкін.

Араб инвестицияларын тарту Қазақстанның көпвекторлы саясатын нығайтып, аймақтағы күштер тепе-теңдігін өзгертуге ықпал ететін маңызды факторға айналуы ықтимал.