Бұл бұйрық ешқандай жаңа талаптар мен міндеттер енгізбейді, деп хабарлайды @Pavlodarnews.kz.

Мемлекеттік кірістер комитетінің мәліметінше, бірқатар БАҚ-та жарияланған материалдарда Қаржы министрінің «Салық төлеушілердің таратылуы, қайта ұйымдастырылуы және қызметін тоқтатуы кезінде салықтық міндеттемені орындаудың кейбір мәселелері туралы» №654 бұйрығы заңнамаға қайшы келеді және компания құрылтайшыларына жаңа міндеттер жүктейді деген пікір айтылды. Осыған байланысты комитет ресми түсініктемесін жариялады.

– №654 бұйрық ешқандай жаңа талап енгізбейді. Бұл бұйрық 2026 жылғы 1 қаңтардан бастап күшіне енетін Салық кодексінің нормаларын іске асыру үшін қабылданған. Онда компаниялар жойылғанда немесе қызметін тоқтатқанда салықтық міндеттемелерді қалай орындауы керектігі айқындалған, – делінген хабарламада.

Негізгі қағида бұрынғыдай қалады: компанияның салықтық берешегі болса – ол Салық кодексінде көзделген тәртіппен өндіріледі. Ал компания мүлкі жеткіліксіз болған жағдайда – құрылтайшылардың жауапкершілігі тек Қазақстан Республикасының заңдарымен тікелей белгіленген жағдайларда ғана туындайды.

– Бұл қағида бұрыннан бар, ол Салық кодексінде, Азаматтық кодексте және Банкроттық туралы заңда көрсетілген. №654 бұйрық осы нормаларды қайталайды және мемлекеттік кірістер органдарының өкілеттіктерін кеңейтпейді, – деді комитеттің баспасөз қызметі.

Ведомствода атап өткендей, құрылтайшы субсидиарлық жауапкершілікке тек ұйым банкрот деп танылғаннан кейін және нақты құқық бұзушылықтар анықталған жағдайда тартылады. Бұған ұйымды әдейі банкроттыққа әкелу, мүлікті шығару немесе жасыру, таратылатын компанияның құжаттарын тапсырмау немесе мүлкі жеткіліксіз кезде сотқа банкроттық туралы өтініш бермеу сияқты әрекеттер жатады.

– Түсінбеушілік туғызған мәселеге келетін болсақ, кейбір жарияланымдар бұйрықтың бір тармағын құрылтайшылардың жауапкершілігін кеңейтеді деп түсіндірген. Алайда бұл тармақ Салық кодексінің 75-бабының нормаларын ғана қайталайды және қолданыстағы ережелерді өзгертпейді, – делінген хабарламада.

Қорытындылай келе, №654 бұйрық заңды бұзбайды және құрылтайшыларға жаңа міндеттер жүктемейді, сондай-ақ мемлекеттік кірістер органдарына жаңа өкілеттік бермейді. Ол тек бұрыннан заңдарда бекітілген рәсімдерді жүйелейді және нақтылайды.