Ол дұрыс таңдау жасау үшін бір ай бойы ойланған, деп хабарлайды @Pavlodarnews.kz тілшісі.

Павлодар машина жасау колледжінде орналасқан №4 референдум учаскесінің тізімінде 1931 азамат тіркелген. Оның ішінде 456 адам дауыс беріп үлгерді. Олардың бірі – Павлодар ауданы әкімінің баспасөз хатшысы, блогер Заур Совет.

Ол таңдау жасау оңайға соқпағанын айтады.

– Мен бір ай бойы референдумда қалай дауыс беруім керек деп ойладым. Әлеуметтік желіден, ғаламтордан АЭС құрылысы туралы көп оқып, ғалымдармен кездесулерге бардым. Соңында өз таңдауымды жасадым, қателескен жоқпын деп ойлаймын, — деді блогер.

Заур Совет әрбір тұрғынның дауысы маңызды  екенін жақсы түсінеді.

– Президентіміз осындай ауқымды жобаның шешімін халық қабылдайтынын айтқан болатын. Тұрғындардың едәуір бөлігі оң дауыс бергенде ғана атом электр станциясының құрылысы басталады, – дейді ол.

Айта кетейік, сағат 12:00-де комиссияның екі мүшесі полиция қызметкерімен бірге дауыс беруге келе алмаған адамдардың мекенжайларына шықты.