Қала тұрғындары өтемақы алу үшін құжаттарын тапсырып жатыр, деп хабарлайды @Pavlodarnews.kz тілшісі.

Павлодар облысының әкімі Асайын Байханов Ақсу қаласында қатты дауылдан кейін жүргізіліп жатқан қалпына келтіру жұмыстарын аралап, жағдайды тексерді.

Қала басшысы Болатбек Шәріповтің мәліметінше, табиғат апатынан зардап шеккен 18 әлеуметтік нысанның 12-сі толықтай қалпына келтірілген. Қалғандарының жөндеу жұмыстары 20 шілдеге дейін аяқталады деп жоспарланып отыр.

– Ең ірі нысандардың бірі – үлкен галереясы бар емхана. Көпқабатты тұрғын үйлердің ішінде 79 үй қайта қалпына келтірілді, тағы 18 үй қалып отыр. Оның 12-сінде жұмыстар жүріп жатыр, ал қалған үйлерге қажетті құрылыс материалдары жеткізіліп, жақын күндері жөндеу басталады. Барлық үйлердегі жұмсақ шатырлар 100 пайыз қалпына келтірілді. Қазір тек қатты шатырлары бар 18 көпқабатты үй қалды. 319 жеке тұрғын үйдің ішінде 79 үй өтемақысын алды, жалпы сома шамамен 30 миллион теңгені құрады. 183 өтініш бойынша зақымдану көлемі айтарлықтай болмағандықтан, өтемақы төлеуден бас тарту туралы шешім қабылданды, – деді Болатбек Шәріпов.

Қазіргі уақытта 51 үй иесі өтемақы алу үшін тиісті құжаттарын тапсырды. Әкімдік өкілдерінің айтуынша, жұмыстар бірнеше күннің ішінде толық аяқталмақ.

Дауыл кезінде 443 көше жарығының бағанасы зақымдалған. Бүгінгі күні 360 бағана түзетіліп, монтажға дайын тұр. Қалған қажетті бөлшектер жақын арада жеткізілетін болады.

– Қазіргі кезде демонтаж жұмыстары жүріп жатыр. 46 бағана жаңасына ауыстырылады. Шамдар жеткізіліп, орнату жұмыстары басталды. Бұл бағытта мердігер ұйымның үш бригадасы жұмыс істеп жатыр. Негізінен бағаналар айналма жол бойында орналасқан, сонымен қатар бейнебақылау камералары орнатылған аудандарда да жаңарту жұмыстары жүріп жатыр. Бұл жұмыстар шілде айының соңына дейін жалғасады, әсіресе аулалардың ішкі аймақтарында. Дауыл салдарынан төрт мыңнан астам ағаш тамырымен құлаған. Қазіргі таңда жасыл желектерді қалпына келтіру жұмыстары қолға алынған, – деп атап өтті Ақсу қаласының әкімі.

Асайын Байханов ең басты міндет – үзілген электр желілерін тез арада қалпына келтіріп, тұрғындарды уақытша жарыққа қосу арқылы олардың қолайсыздығын азайту екенін айтты.

– Барлығы 443 бағана зақымданған, оның 360-ы қалпына келтірілді. 24 бағана бұзылып, олардың орнына жаңалары орнатылып жатыр. Айырмашылық – 83 бағана. Тағы 124 бағана да демонтаждалған. Ал қалған 59 бағана қайда кетеді? – деп сұрады облыс басшысы.

Болатбек Шәріпов ертең 75 жаңа бағана жеткізіліп, орнату жұмыстары дереу басталатынын хабарлады.

Облыс әкімі ағаштарды сауықтыру шараларының да барысын бақылап шықты. Бұл жұмыстарға кіріспес бұрын мамандар дендрологтардың ұсынымдарына сүйенуі тиіс екенін ескертті.

– Ағаштардың кесілген жерін міндетті түрде өңдеп, инфекция түсіп кетпеуін қадағалау керек. Дезинфекциялық шараларды назардан тыс қалдыруға болмайды. Егер бір жағынан емдеп, екінші жағынан зақым келтірсек, бұл жүйесіз жұмыс болады. Әр істі ақылмен атқару керек, – деді Асайын Байханов.

Табиғат апатынан шамамен төрт мың ағаш құлаған, олардың 90 пайызының бұтақтары шығарылып болды. Өңір басшысы соңғы жылдары жүргізілмей келген санитарлық кесу жұмыстарына да назар аударды.

– Бұл дайындық емес, өз міндеттерін орындамаудың көрінісі. Қазір антенналар қисайып тұр, жабдықтар жиналмаған. Полиция қызметкерлері қайда қарап отыр? Учаскелік инспекторлар үй иелерімен байланысуы тиіс. Салбырап тұрған сымдар – айқын қауіп. Егер біреу зардап шексе, жауапкершілік әкімдікке жүктеледі. Бұл антенналарды шамамен 15 жылдан бері ешкім қолданбайды, оларды алып тастау керек, – деп тапсырма берді өңір басшысы.

Қазіргі басты мәселе – электр қуатының жоқтығы. Салбырап тұрған сымдар желілерді зақымдап, тұрғындар жарықсыз қалды.

Бүгінде қалада төрт бригада жұмыс істеп, күн сайын шамамен 200 ағашты кесуде. Барлығы төрт мыңнан астам зақымданған ағаш кесіліп, 2,5 мыңы жасартылды. Тағы үш мың ағаш жұмыс жоспарына енгізілген.

Зардаптарды жоюға 126 техника бірлігі, 11 ағаш кесу бригадасы және 1 500-ден астам адам жұмылдырылған. 7,5 мың тоннадан астам қоқыс пен бұтақтар шығарылды.

Еске салайық, 19 маусымда Ақсуда болған дауыл 459 нысанға зиян келтірген. Зақымданғандардың басым бөлігі – білім беру және мәдениет мекемелері. Қалада желдің екпіні секундына 35 метрге жеткен. Қалпына келтіру жұмыстарына Май, Ақтоғай және Ертіс аудандарынан келген бригадалар қолдау көрсетіп, 60-тан астам адам қатысқан. Дауыл кезінде 57 жастағы Марина Пахомова қаза тапты – ағаш сынығы отырған таксидің терезесін тесіп өткен.

Ақсуды қалпына келтіруге шамамен бір миллиард теңге бөлінді. Жұмыстарды қанағаттанарлықсыз орындағаны үшін Болатбек Шәріповке, облыс әкімінің бірінші орынбасары Серік Батырғожиновқа және Ақсу әкімдігі аппаратының басшысына сөгіс жарияланды.