Рейтингте еліміз 47-орынға жайғасты, деп хабарлайды @Pavlodarnews.kz.

Халықаралық валюта қорының (ХВҚ) болжамы бойынша, елдің номиналды жалпы ішкі өнімі (ЖІӨ) жыл қорытындысында 398 миллиард долларға жетеді. Бұл көрсеткіш бойынша Қазақстан Чили мен Перуден кейін орналасып, Португалия, Финляндия және Грекиядан озып тұр.

Visual Capitalist порталы ХВҚ-ның қазан айында жарияланған деректері негізінде әлем елдерінің экономика көлемі бойынша рейтингін жасады. Бір жыл бұрын Қазақстанның болжамды ЖІӨ-сі шамамен 320 миллиард доллар болған. Осылайша, бір жыл ішінде ел экономикасының номиналды көлемі шамамен төрттен біріне ұлғайған.

ХВҚ биыл Қазақстанның нақты ЖІӨ өсімін 4,4% деңгейінде болжайды. Бұл АҚШ, Еуроаймақ, Германия, Ресей және Жапонияның болжамды көрсеткіштерінен жоғары. Ал келесі жылы экономикалық өсім 4,9%-ға дейін жеделдеуі мүмкін.

Қазақстан Орталық Азиядағы ең ірі экономика мәртебесін сақтап отыр. ЖІӨ көлемі бойынша Өзбекстан 61-орында орналасқан. Қазақстан экономикасының көлемі көрші елдің көрсеткішінен екі есе жоғары. Биыл жан басына шаққандағы ЖІӨ 19 мың доллардан асады деп күтілуде.

Ұлттық экономика министрлігінің мәліметінше, қаңтар-қыркүйек айларында шикізаттық емес сектор 5,4%-ға өскен. Ең жоғары өсім құрылыс саласында тіркеліп, 11,5%-ды құрады. Өңдеу өнеркәсібі, көлік және сауда салаларында да өсім байқалған. Бірінші жартыжылдықта өңдеу өнеркәсібінің ЖІӨ-дегі үлесі 14,1%-ға жетті.

ХВҚ болжамынша, алдағы жылдары Қазақстан экономикасының өсімі жалғасуы мүмкін. Алайда оның тұрақтылығы экономиканы әртараптандыруға, өңдеу өнеркәсібін дамытуға және шикізаттық емес сектордың үлесін арттыруға байланысты болмақ.