Бозшакөл мектебіндегі 44 оқушының 17-сі қазақ сыныптарында білім алуда, деп хабарлайды  @Pavlodarnews.kz тілшісі.

«Ел баласы» жобасы аясында Екібастұз қалалық мәслихатына «Ауыл» партиясынан сайланған депутат Жетпісбай Жакупов Бозшакөл ауылындағы негізгі жалпы білім беру мектебінің жоғары сынып оқушыларымен кездесті. 

Кездесуден бұрын халық қалаулысы мектеп басшысы Батырбек Есімхановпен бірге білім ошағын аралады. 

Үш қабатты ғимарат іші ұядай жып-жылы, 2014 жылы күрделі жөндеуден өтіп, есік-терезелері толық ауыстырылған. Ал 2020 жылы екі қазандық пен жылыту ғимаратының мұржасы жаңартылған. 

– Мектепте 18 мұғалім еңбек етеді, бірқатары – әлеуметтік қолдауға ие болған жас мамандар. Білім беру процесіне мультитач панельдері қажет еді, – деп Батырбек Есімханов әңгіме арасында тілегін білдірді. 

Кездесу барысында Жетпісбай Қайырбекұлы оқушылардың түрлі тақырыптағы сұрақтарына жауап бере отыра, 10 жыл мектепте қазақ тілі мен әдебиеті пәні мұғалімі болып еңбек еткенін, алдынан екі бірдей «Алтын белгі» иегері шыққаны жайлы әңгімелеп берді. Балалар қайырымдылық туралы да сұрастырды. Блиц-сұхбат форматында өткен басқосу өте мазмұнды өтті.

Айта кетейік, Екібастұз қаласының әкімі Аян Бейсекиннің бастамасымен «Ел баласы» жобасы шеңберінде жергілікті атқарушы органдар, мемлекеттік және құқық қорғау органдары өкілдерінің, кәсіпкерлер мен депутаттардың қатысуымен сынып сағаттары ұйымдастырылуда.