Екі жыл ішінде облыстық пәндік олимпиадада 71 медальге қол жеткізілді, деп хабарлайды  @Pavlodarnews.kz тілшісі.

– Оның ішінде 12-сі –  алтын, 24-і – күміс, 35-і – қола. Республикалық кезеңде 11 жүлделі орын бар. Оның ішінде үшеуі – алтын, үшеуі – күміс, бесеуі – қола.  10 жыл бойы мектеп оқушыларының олимпиадалық командасы облыста үздік атанып келеді, – деп жазды қалалық білім беру бөлімінің басшысы Қуаныш Қыдыралин.  

Сондай-ақ ол мұғалімдер қалалық, облыстық республикалық байқауларға қатысып, жүлделі орындарға ие болып жүргенін атап өтті. 

– Білім беру бөлімінің командасы көптеген жобаларды жүзеге асырды. Кадрлық резерв құрылды, үш балабақша жаңартылды, үш мектепке толық күрделі жөндеу жүргізілді, буллингке қарсы іс-қимыл бойынша кешенді жоспар әзірленді, тамақтану мониторингісі бойынша жұмыс қайта қаралды, – деді бөлім басшысы. 

Айта кетерлігі, былтырғы олимпиаданың қалалық кезеңіне Павлодар қаласының 42 жалпы білім беретін мектебінен 9-11-сыныптардың 747 оқушысы қатысты. Жалпы білім беретін пәндер бойынша олимпиада екі күнде жаратылыстану-математикалық және қоғамдық-гуманитарлық бағыт бойынша өтті. 

Олимпиада жеңімпаздары 2024 жылдың қаңтар айында облыстық кезеңге қатысады.