Облыстық «Sarsadaq Qonys» дәстүрлі садақ ату федерациясының ұйымдастыруымен жасөспірімдер арасында «Зерде» мамандандырылған мектеп-лицейінде  турнир өтті, деп хабарлайды @Pavlodarnews.kz тілшісі. 

Жарысқа  9 команда қатысып, 72 спортшы өз бақтарын сынады. 

Жасөспірімдерді садақ атуға Павлодар облыстық дәстүрлі садақ ату федерациясының төрағасы Нұрбек Мұқышев баулып жүр. Бүгінгі күні қалада дәстүрлі садақ ату спортымен айналысып жүрген жастардың қатары көбейіп келеді.

– Садақ ату шыдамдылықты талап ететін спорт түрі болып саналады. Әр адам қабілетіне қарай меңгереді.  Қазіргі уақытта мектеп оқушыларының садақ атуға деген қызығушылығы артып келеді. Біздің басты мақсат – дәстүрлі садақ атуды жүйелі дамыту, – дейді Нұрбек Мұқышев.

Жарыстың «Қалқан нысанасы» атты алғашқы кезеңінде әр спортшыға үш мүмкіндіктен беріліп, әр мүмкіндікте бес жебеден атылды.  Ал, «Жамбы нысанасы» атты екінші кезеңде әр тиген оққа тоғыз ұпай беріліп, ұпай сандары тең түскен жағдайда бес оқтан  мүмкіндік берілді. Ең жоғарғы ұпай –  135 ұпай болып саналды.

Жарыс қорытындысында 7-9 жастағы ұлдар арасында Дінмұхамбет Нұрмұхамбеттің жебесі нысанаға көбірек дөп тиіп, I орын иеленді. II орынға Нұрәли Серіков, жүлделі III орынға Темірлан Серіков лайық деп танылды. 

Қыздар тобында  Ханшайым Қайдарбекова пен Арайлым Қабдулсамалова  топ жарды. Жеңіске қол созымдай ғана жетпей қалған Ұлпан Құралова II орынды қанжығаласа, III орынды  Аяжан Ғабит жеңіп алды. 

10-12 жас аралығында I орынды Расул Абдрахманов, II орынды Қасымхан Қаббар, III Ілияс Чебентаев иеленді. 

Ал 13-15 жас аралығында Әлихан Айткенов I орынға, Әділет Шаяхметов II орынға, Баянауыл ауданынан келген Еларыс Ермекбай III орынға ие болды. Қыздар арасында топ жарған Аяжан Шарипова I орын иеленсе, II Мөлдір Мақылбек алды. III орын Алтынай Болатқа бұйырды. 

16-17 жас аралығында Тереңкөл ауданынан Темірлан Қайырбаев I орынмен марапатталды. Ал қыздар арасында I орынмен Қарақат Жаролла, II орынмен Алуа Шоқан, III орынмен Аружан Қаракесек марапатталды. 

Командалық жарыста I орынды  Екібастұз қаласы, II орынды Павлодар қаласының командасы, III орынды Ақулы ауданы иеленді. Қатысушыларға Алғыс хаттар табысталды.