Ол бұл лауазымда екі жыл тоғыз ай жұмыс істеді, деп хабарлайды @Pavlodarnews.kz тілшісі.

Осы кезеңде облыстық кәсіпкерлер палатасының кәсіпкерлерге қызмет көрсету орталығында экономиканың нақты секторындағы мыңдаған өкілге консультациялық көмек көрсетіліп, кәсіби бизнес-жоспарлар мен өзге де қызметтер ұсынылды.

– Аталған уақыт ішінде қорғалған кәсіпкерлердің заңды құқықтары мен мүдделерінің жалпы сомасы 2 миллиард 798 миллион теңгеден асты. Бизнестің құқықтарын қорғау бағыты бойынша Палата қызметкерлері 141 өтінішті қарап, 25 сот отырысына қатысты, – деді өңірлік кәсіпкерлер палатасының баспасөз қызметі.

2024 жылғы көктемгі су тасқыны кезінде өңір кәсіпкерлері мен тұрғындары зардап шеккен шақта Палата бизнес өкілдерімен бірлесіп Павлодар Ертіс өңіріне ғана емес, Қостанай және Солтүстік Қазақстан облыстарына да ауқымды қайырымдылық көмек көрсетті.

Ал 2023 жылғы құрғақшылық кезеңінде «Атамекен» палатасы аграршыларды ресми түрде зардап шегуші ретінде тану бағытында жұмыс жүргізді. Нәтижесінде облыс әкімдігі құрғақшылық салдарын азайту мақсатында фермерлерге қолдау шараларын қабылдады.

– Жергілікті бюджеттен жем-шөп дайындау шығындарын арзандатуға үш миллиард теңге бөлініп, 1,5 мыңнан астам мал шаруашылығы субъектісі мемлекеттік қолдау алды, – делінген хабарламада.

Сонымен қатар шөп шабу жұмыстарына арналған арзандатылған дизель отынының көлемі төрт мың тоннадан 10 мың тоннаға дейін ұлғайтылды. Жанармайдың жеңілдетілген бағасы литріне 232 теңгені құрап, нарықтық бағадан 21 пайызға төмен болды.

Шөп дайындау үшін мемлекеттік орман қоры жерлерінен 25 мың гектардан астам қосымша шабындық алқаптар бөлініп, бұл шамамен 20 мың тонна шөп дайындауға мүмкіндік берді. Сондай-ақ қыстақ кезеңінде халыққа сату үшін көлемі бес мың тонна болатын жемдік астықтың тұрақтандыру қоры құрылды.

Үкімет қолдауымен республикалық бюджеттен инвестициялық шығындарды, тұқым, пестицидтер, минералды тыңайтқыштар, асыл тұқымды және селекциялық жұмыстарды субсидиялауға 6,8 миллиард теңге бөлінді. Бұдан бөлек, облыстың 38 шаруашылығы құрғақшылыққа байланысты 1,3 миллиард теңге көлемінде сақтандыру төлемдерін алды.

Ерқанат Әбеновтің басшылығымен өткен толық емес үш жыл ішінде өңір кәсіпорындары «Қазақстанның үздік тауары», «Парыз» және «Бір ауыл – бір өнім» байқауларында жоғары нәтижелерге қол жеткізді.

– 2025 жылы «Парыз – 2025» арнайы сыйлығының «Жылдың үздік әлеуметтік жобасы» номинациясында Железин ауданындағы «789KZ» жеке кәсіпкерлігі марапатталды. Ал «Еңбекті қорғау саласындағы үздік кәсіпорын» аталымында «Қазақстан алюминийі» АҚ жеңімпаз атанды. «Үздік азық-түлік тауарлары» номинациясында павлодарлық «Айсберг ПВ» кәсіпорны үздіктер қатарынан көрінді, – деп атап өтті палатаның баспасөз қызметі.

Сондай-ақ оның басшылығы кезінде адами капиталды дамытуға ерекше көңіл бөлініп, Павлодар мен Ақсуда кәсіби құзыреттерді растау бойынша екі орталық ашылды.

Инвесторларды қорғау жұмысы да жаңа деңгейге көтерілді. Облыс прокурорының өкімімен Павлодар облысы кәсіпкерлер палатасы базасында мемлекеттік және үкіметтік емес ұйымдар өкілдерінің қатысуымен инвесторларға құқықтық кеңес беру және проблемалық мәселелерді шешуге жәрдем көрсету бойынша «Фронт-офис» құрылды.

– Өңірлік «Атамекен» палатасы фронт-офистің қызметін тұрақты түрде үйлестіріп, инвесторлармен жедел өзара іс-қимылдың негізгі алаңы ретінде жұмыс атқарды. Әкімшілік кедергілерді жедел анықтау және жою мәселесіне ерекше назар аударылды. Инвесторлардың қатысуымен тұрақты түрде жұмыс кездесулері, отырыстар және көшпелі іс-шаралар ұйымдастырылып, жобаларды іске асырудың өзекті мәселелері талқыланды, – деді палата қызметкерлері.

Ерқанат Әбеновтің басшылығы кезінде фронт-офистің 13 отырысы өткізілді.

Қазіргі уақытта өңірлік Палата жанында жеті салалық кеңес, бір салааралық кеңес жұмыс істейді. Олардың құрамына 154 қатысушы енген. Сонымен қатар 79 бизнес өкілінен құралған 10 аудандық кеңес қызмет етеді.

Тек өткен жылдың өзінде Ерқанат Әбеновтің кезінде кеңестердің 60-тан астам отырысы өткізіліп, кәсіпкерлікті дамыту, өңірдің инвестициялық тартымдылығын арттыру және жүйелі кедергілерді жою мәселелерін қоса алғанда 100-ден астам өзекті мәселе қаралды.

Ал 2026 жылдың бірінші тоқсанында салалық кеңестердің 11 отырысы өтіп, оның аясында бизнестің проблемалық мәселелерін анықтау және шешу жұмыстары жалғастырылды.

2025 жылдың көктемінде өңірлік «Атамекен» палатасының қызметкерлері облыс әкімдігімен бірлесіп Қазақстан Премьер-Министрі Олжас Бектеновтің Павлодар облысына жұмыс сапары барысында бизнес өкілдерімен кездесулер ұйымдастыруға қатысты.

Палата мәліметінше, бұл жұмыстар мемлекеттік органдармен тығыз өзара іс-қимылда және өңір басшысы Асайын Байхановтың қолдауымен жүзеге асырылды. Аймақ басшысы көптеген жүйелі мәселелерді жеке бақылауында ұстап, өңірлік «Атамекен» палатасына оларды шешуге тікелей қолдау көрсеткен.