Өңір 2026 жылдың алғашқы айын экономикалық көрсеткіштердің оң динамикасымен бастап, өңдеу өнеркәсібіндегі басымдығын нығайта түсті, деп хабарлайды @Pavlodarnews.kz тілшісі.

Аймақтық индустриялық-инновациялық даму басқармасының мәліметінше, 2026 жылғы қаңтарда негізгі капиталға салынған инвестициялар 2025 жылғы қаңтарға қарай 6,5%-ға өсіп, 25,97 миллиард теңгені құрады. Оның ішінде өңдеуші секторға бағытталған инвестиция көлемі 7,8 миллиард теңгеге жетті.

Павлодар облысының өнеркәсіптік кәсіпорындары 1,4% өсіммен 367,5 миллиард теңгеге өнім шығарды. Айта кетерлігі, жалпы өндіріс көлемінің шамамен 54%-ы өңдеу саласына тиесілі болып отыр.

Өңдеу секторындағы көрсеткіштер 2025 жылдың қаңтарымен салыстырғанда 2,8%-ға артты. Салалар бөлінісінде ең жоғары өсімді жеңіл өнеркәсіп көрсетіп, өндіріс көлемі 2,4 есеге ұлғайды.

Сонымен қатар дайын металл бұйымдарын өндіру 28,4%-ға, тамақ өнімдері мен фармацевтика салалары 20%-ға, ал химия өнеркәсібі 15,4%-ға өсті. Мұнай өңдеу саласы 3,3%-дық, металлургия 2,3%-дық және құрылыс индустриясы 4,1%-дық тұрақты өсім көрсетіп отыр.