Кәсіпорында автоматтандыру, деректерге негізделген басқару және технологиялық процестерді цифрлық модельдеу құралдары енгізілген, деп хабарлайды @Pavlodarnews.kz тілшісі.

Павлодар мұнай-химия зауытында өндірістік процестерді тиімді басқару және энергия қауіпсіздігін күшейтуге бағытталған бірқатар цифрлық шешімдер таныстырылды. Кәсіпорында автоматтандыру, деректерге негізделген басқару және технологиялық процестерді цифрлық модельдеу құралдары енгізілген. Мамандардың айтуынша, бұл шешімдер адам факторын азайтып, өндірістің сенімділігі мен үздіксіз жұмысын қамтамасыз етеді.

Зауыттың бас энергетигі Самалбек Жарасов журналистерге электрмен жабдықтауды басқарудың автоматтандырылған диспетчерлік жүйесі туралы айтып берді. Оның сөзінше, жүйе кәсіпорынның бүкіл электрмен жабдықтау сызбасын нақты уақыт режимінде көрсетеді және тұтынуды толық бақылауға мүмкіндік береді. Ол қазіргі уақытта зауыт екі тәуелсіз көзден электр энергиясын алатынын атап өтті.

- Қазіргі таңда біз электр шаруашылығын басқару диспетчерлік пунктіндеміз. Бұл мониторда зауыттың электрмен жабдықтаудың бір желілік схемасы көрсетілген. Автоматтандырудың арқасында біз электрмен жабдықтау сенімділігін едәуір арттырдық, - дейді ол. – Жүйе барлық көрсеткіштерді онлайн режимде көрсетеді. Кез келген ақау немесе ауытқу болған жағдайда диспетчер дереу әрекет ете алады. Бұл біздің кәсіпорын үшін аса маңызды.

Самалбек Жарасовтың айтуынша, енгізілген жүйе электр энергиясын тұтыну балансын толық бақылауға, сондай-ақ өндірістің тұрақтылығын қамтамасыз етуге көмектеседі.

Келесі кезеңде журналистерге орталық өндірістік-диспетчерлік басқару орталығы таныстырылды. Мұнда MES және Aspen Hysys жүйелерінің жұмысы көрсетілді. Цифрландыру, ақпараттық технологиялар және телекоммуникациялар департаментінің директоры Дмитрий Осадчий MES жүйесінің мүмкіндіктеріне тоқталды. Оның айтуынша, бұл жүйе өндірістік деректерді біріктіріп, оларды талдауға және басқарушылық шешімдер қабылдауға мүмкіндік береді. 

- Бұл – өндірістің IT-орталығы. Мұнда жабдықтардан, зертханалардан және басқа да көздерден алынған деректер жинақталады. Біз осы ақпарат арқылы өндірістік процестерді басқарамыз, – деді ол. – Сонымен қатар, жүйе визуализация мен талдауға кең мүмкіндік береді. Бізде 900-ден астам мнемосхема бар. Жүйе көрсеткіштердің трендтерін бақылауға, олардың өзара байланысын талдауға мүмкіндік береді. Егер мұндай жүйе болмаса, біз іс жүзінде «соқыр» болар едік.

Дмитрий Осадчийдің сөзінше, MES жүйесі басқа цифрлық платформалармен біріктіріліп, өндірісті «бір терезе» қағидаты бойынша басқаруға жағдай жасайды.

Aspen Hysys жүйесі туралы өндірісті жоспарлау және талдау бөлімінің бастығы Сергей Халатов баяндады. Ол бұл құрал өндірістік жоспарлауды оңтайландыруға мүмкіндік беретінін атап өтті.

- Бағдарлама шикізат сапасын, нарық сұранысын және өндірістік мүмкіндіктерді ескере отырып есептеулер жүргізеді. Біз айлық және жылдық өндіріс жоспарларын жасаймыз. Сонымен қатар, жүйе технологиялық процестердің цифрлық егізі ретінде жұмыс істейді. Бұл – технологиялық қондырғылардың цифрлық моделі. Ол бізге технологиялық режимдерді өзгерткен жағдайда нәтижені алдын ала көруге мүмкіндік береді. Бұл қауіпсіздік пен өнім сапасын арттыруға көмектеседі, – деді ол.

Жетекші инженер Андрей Смык цифрлық модельдеу жүйелерінің негізгі артықшылықтарының бірі энергия тиімділігін арттыру екенін атап өтті. Оның айтуынша, мұндай шешімдер өндірістің энергетикалық көрсеткіштерін оңтайландырып, нақты экономикалық пайда әкеледі.

Жалпы, ПМХЗ-дағы цифрландыру – бұл нақты деректерге негізделген басқару, интеллектуалды бақылау және технологиялық процестерді барынша автоматтандыру. Мұндай тәсіл өндірістегі тәуекелдерді азайтып, зауыттың сенімді әрі үздіксіз жұмысын қамтамасыз етеді.