Бұл тақырып облыс әкімдігінде талқыланды, деп хабарлайды @Pavlodarnews.kz тілшісі.

Төтенше жағдайлар департаментінің басшысы Рустамбек Амриннің хабарлауынша, облыстың барлық аумағында жүз пайызға қар жамылып, жер беті 60 пайызға ылғалды болып тұр. Қардағы су мөлшері нормадан асуда.

Су басу қаупі бар аймақтарды бақылау үшін Ақтоғай, Баянаул аудандарын және Қарағанды облысындағы Ақжар және Қаратоқа бөгеттерін ішінара қамту арқылы аэромониторинг жұмыстары жүргізілді.

Ақпаратқа сәйкес, Ақмола және Қарағанды облыстарында да қар деңгейі нормадан асып, Ақтоғай және Баянауыл өңірлеріне қауіп төндіруде.

– Бүгінгі таңда Шүлбі су қоймасы өткен жылмен салыстырғанда аздап толған. Сондықтан Павлодар және Ақсу қалаларының әкімдіктерімен бірлесе отырып, бекініс жұмыстарын жүргізуді тезірек бастау қажет, – деп түсіндірді Төтенше жағдайлар департаментінің басшысы.

Бүгінгі таңда 18 шақырымға жуық қорғаныш бөгеттері салынып, төрт шақырымнан астам су бұру каналдары жөнделді, 24 су ағызатын құрылыстар ауыстырылды.

Қалалар мен аудан әкімдіктері жергілікті бюджеттен 104 портативті мотопомпа, 15 мыңнан астам қап, 61 сору және жеткізу құбыршектерін сатып алған.

«Қазгидромет» РМК филиалының директоры Галина Шпактың айтуынша, ақпанның екінші онкүндігінде жауын-шашын болып, ауа температурасы нормадан екі градусқа жоғарылайды. Наурызда ауа температурасы нормадан 1-2 градусқа жоғары болады деп көрсетілмек.

– Павлодар облысы «жасыл аймақ» санатына жатқызылғанымен, дайындығымыз жоғары болуы керек. Баянауыл, Май, Павлодар және Ақтоғай аудандарындағы жағдай ерекше назар аударуды қажет етеді. Аудан әкімдері су тасқыны болған тарихи орындарды зерттеп, ауа райын, су қоймаларының толтырылуын қадағалап, халықты және инфрақұрылымды қорғау үшін барлық алдын алу шараларын қабылдауы қажет, – деп атап өтті облыс әкімінің бірінші орынбасары Серік Батырғожинов.

Отырыс қорытындысы бойынша салалық басқармаларға, сондай-ақ, қала және аудан әкімдеріне 20 ақпанға дейін қар жинау мен шығаруды қамтамасыз ету, ал «ҚазАвтоЖол» филиалымен бірлесіп, 1 наурызға дейін жол су өткізгіштерін ашу шараларын қабылдау тапсырылды. Төтенше жағдайлар департаментіне су тасқынына дайындық жұмыстарын барынша бақылауда ұстау тапсырылды.

Фото: Павлодар облысы әкімдігінің баспасөз қызметі