Яғни квазимемлекеттік компанияның шотында қомақты қаржы пайдаға жаратылмаған, деп хабарлайды  @Pavlodarnews.kz тілшісі.  

Қазақстан Республикасы Жоғары аудиторлық палатасының мәліметінше, Павлодар облысы әкімдігінің ведомстволық бағынысты ұйымдарының біріне қатысты мемлекеттік қаражатты пайдалану кезінде қаржылық тәртіпті қамтамасыз ету бойынша шаралар қабылданды. Жұмыс Жоғары аудиторлық палатаның нұсқамасы бойынша жүргізілді.

ҚР Қаржы министрлігінің Қазынашылық комитетінде жүргізілген мемлекеттік аудит кезінде өңірдегі квазимемлекеттік компаниялардың бірінің қолма-қол ақшаны бақылау шотында үш жылдан астам уақыт бойы 2,1 миллиард теңгеден аса қаражаттың пайдаланылмай тұрғаны анықталды.  

Осыған байланысты Павлодар облысының әкімдігіне қаражатты одан әрі пайдалану бойынша шаралар қабылдау тапсырылды.

18 наурыздағы жағдай бойынша бұрын жасалған шарт шеңберінде «Қазақтелеком» АҚ пайдасына екі миллиард теңгеден астам қаражат аударылды.

Қосымша 114 миллион теңгеден аса қалдықты пайдалануға беру туралы шешім қабылдануда. Бұл мәселе және мемлекеттік аудит қорытындылары бойынша басқа да тапсырмалардың орындалуы Жоғары аудиторлық палатаның бақылауында болады.